Charter Document - 04800043

Ego Dei gratia Carnotensis comes Tetbaldus nomine notum fieri presentibus et futuris volo quod mater mea Adela comitissa pro anima comitis Stephani patris mei et pro sua suorumque animabus contulit monachis Sancti Martini Majoris Monasterii Turonensis ecclesiam et prebendas Sancti Martini de Valle in suburbio Carnotensi ita ut canonicis qui tunc ibi erant decedentibus vel vitam suam mutantibus sive prebendas suas canonico juditio amittentibus monachi loco eorum succederent et ecclesiam illam cum sibi pertinentibus jure perpetuo possiderent Quam mutationem clericalis ordinis in monasticum ordinem debere fieri cogente Canonum auctoritate Ivo Carnotensis ecclesie tunc venerabilis episcopus asserebat dicens se ab antecessoribus accepisse ecclesiam illam antiquitus monasterium extitisse habet autem ut ipse dicebat canonica auctoritas ea loca que aliquando fuerunt monasteria ulterius non licere fieri habitacula secularia Igitur per consilium ejus et manum mater mea supradictis monachis prefatam ecclesiam contulit et ipsum donum sigillis et literis domni pape Paschalis Secundi et ipsius episcopi firmatum est Verumtamen quibusdam causis impedientibus non statim fuerunt monachi corporali investitura investiti in quo intervallo contigit ipsum papam et ipsum episcopum de hoc mundo migrasse et matrem meam vitam monachilem accepisse et dominium Carnotensis comitatus in manum meam devenisse Dolens igitur valde mater mea quod prefata elemosina non satis plene consummata remansisset et plurimum desiderans ut ante mortem suam compleretur quatinus ejus anima de hujus mundi carcere securior et letior solveretur sepe et sepius preces jungens precibus me rogavit ut dum michi liceret et ipsa viveret ipsam elemosinam perficerem ne forte morte vel aliquo periculo prepeditus quando vellem perficere non valerem Prebebat etiam testimonium quod ego aliquando ipsi elemosine meum dedissem assensum Tam piis igitur tamque frequentibus matris mee testimoniis et peticionibus admonitus perficere elemosinam disposui dominoque et venerabili pape tunc temporis Honorio rem ex ordine mandavi et ab eo consilium et confirmationem requisivi qui michi in hunc modum rescripsit Deo et tibi comes Tetbalde fili karissime grates referimus quod religiosos viros et sancta monasteria veneraris et diligis et pauperes Dei foves et nutris Tue quoque bone voluntati congaudentes mandamus ut quod ratio postulat faciendo ecclesiam illam et prebendas Sancti Martini de Valle in manu fratris nostri Gaufredi venerabilis Carnotensis episcopi refutes ut sic demum monachi Sancti Martini Turonensis valeant eas de manu episcopi recte suscipere et nos si opus fuerit debeamus nostram confirmationem supradictis confirmationibus adjungere Et quia idem Gaufredus episcopus tunc temporis Rome erat precepit ei ore ad os ipse dominus papa Honorius ut quando ego prebendas illas in manu ipsius refutassem ipse de prebendis et de ecclesia abbatem et monachos Majoris Monasterii investiret et in usus et potestatem eorum redigendas jure perpetuo confirmaret Et ita factum est Deo siquidem favente et omnia ad votum nostrum prosperante vir religiosus Matheus nomine Albanensis episcopus et sedis Romane legatus Carnotum venerat qui tamquam ad hoc ipsum a Deo transmissus vices domini pape in Galliis tunc agebat Ipse igitur ab episcopo et a me expetitus ad ecclesiam Sancti Martini de Valle venit ubi ipso presente cum ingenti multitudine cleri et populi prebendas illas in manum episcopi refutavi sed custodiam rerum exteriorum ipsius ecclesie et consuetudines quas in ipsis exterioribus rebus et hominibus eatenus habueram non dimisi quin etiam ipsas prebendas si aliquando ipsi monachi quoquo modo quod absit perdiderint me ut antea tenueram deinceps retenturum coram assistentibus asserui His ita actis episcopus de prebendis et de ecclesia abbatem Majoris Monasterii Odonem nomine qui et ipse presens erat per quendam librum et per cordas signorum investitit et in manum ei tradidit Que omnia ipse prefatus legatus auctoritate Dei et beati Petri et domini pape Honorii cujus tunc vice ut dictum est fungebatur confirmavit Nomina eorum qui hec viderunt et audierunt hec sunt Gualterius archidiaconus Ansgerius archidiaconus Salomon cantor Galerannus prepositus Hainricus prepositus Robertus Bene Venit Adelardus canonicus et capellanus meus et multi alii clerici sive canonici De monachis Majoris Monasterii Tetbaldus de Columbis Nicholaus de Baiocis Gilduinus frater Galeranni prepositi Gualterius Compendiensis Mauritius monachus et Gaufredus Lepus Rainaldus de Castello Gunterii Hugo hospitalarius et Gualterius subhospitalarius Tetbaldus monachus Sancti Petri Carnotensis et multi alii Milites mei sive servientes vel alii homines Amalricus de Mestenone et Gunherius de Alneto Gunherius de Morvilla Ansoldus telonearius et Clemens filius ejus Tetbaldus Claronis et Barbous de Sancto Petro Vitalis filius Algardis et Adelardus Rufus Paganus major et Hubertus et Hildegarius fratres ejus Ingelbertus cellararius Vitalis et Rainaldus frater ejus Ysacar et Gaufredus et Robertus servientes monachorum de Valle Sancti Martini et multi alii De famulis Majoris Monasterii Paganus camerarius Johannes mariscalcus Gaudinus miles Petrus Martini Radulfus coquus Algerius Gazel Eschivardus Petrus Barba et alius Petrus Gualterius Tardivus et alii multi Porro in crastinum ipsius diei nobis positis in Turre mea Carnoti concessit id ipsum comitissa uxor mea Mathildis nomine me rogante audientibus et videntibus Hugone vicecomite de Pusiato et multis militibus sive servientibus et meis et suis et jamdicto Majoris Monasterii abbate Odone cum proxime nominatis monachis et famulis suis Actum anno incarnationis dominice MCXXVIII indictione vi epacta xvii