Charter Document - 04800027

Paschalis episcopus servus servorum Dei venerabili fratri I[voni] Carnotensi episcopo et tocius capituli fratribus salutem et apostolicam benedictionem Audivimus in regionum vestrarum ecclesiis quasdam pravas consuetudines emersisse et in ecclesia vestra precipue vigere super hec etiam quedam contra canonum statuta presumi Nos vero sanctorum patrum statuta sequentes et ab omnibus ea intemerata servari volentes easdem consuetudines penitus abdicamus et Sancti Spiritus auctoritate prohibemus ut in aliena stipendia nullus obrepat nec beneficia presbiterorum que apud vos junioratus vocantur alii habeant ut missas non cantent et evangelia non legant presbiteri aut diacones conducticii ut pro prebendis vel ecclesiasticis beneficiis munus aliquod non exigatur Precipimus etiam ut cleri qui negotia ecclesiastica ad seculares potestates deferentes ecclesiam gravant infames habeantur donec condigne satisfaciant De concubinarum filiis que a predecessoribus nostris statutum est inconvulsum serventur Ut qui non precedente canonica excusatione se promoveri non permittunt suis reddantur minoribus inferiores Secundum capitulum Cartaginiense et secundum institutum pape Gelasii plus accipiat presbiter quam diaconus diaconus quam subdiaconus et qui studiosus militat tardioribus plus stipendiorum accipiat Ut ornamenta ecclesie nemo vendat aut distrahat nisi pro ea necessitate quam canones permittunt Et qui aliter fecerit sacrilegii reus et canonum contemptor habeatur De his autem que apud vos precarie dicuntur que tua fraternitas disposuerit nos ratum habemus Illam sane excommunicationem quam de domibus que ecclesie tue contigue fuerant pro ejusdem ecclesie utilitate dictasti nos assertionis nostre auctoritate firmamus Datum Beneventi III idus novembris