Charter Document - 04740054
| Charter Number: | 04740054 |
|---|---|
| Cartulary Title: | Charters of Westminster |
| Charter Language: | English |
| Charter Origin: | Religious |
| Charter Type(s): | Record |
| Date: | 0950 - 0968 |
| Date type: | Assigned |
| Resource Link(s): |
Anglo Saxon Charters (S 1447) Westminster Abbey Muniments - W.A.M. VIII eSawyer (S 1447) |
Charter:
Se fruma wæs þæt mon forstæl ænne wimman æt Ieceslea Ælfsige Byrhsiges suna Þurwif hatte se wimman Þa befeng Ælfsige þone mann æt Wulfstane Wulfgares fæder þa tymde Wulfstan hine to Æþelstane æt Sunnanbyrg þa cende he tem et let þone forberstan et forbeh þone andagan æfter þam bæd Ælfsige ægiftes his mannes et he hine agef et forgeald him mid twam pundum þa bæd Byrhferð ealdormann Æþelstan hys wer for þam tembyrste þa cwæð Æðelstan þæt he næfde him to syllanne þa cleopode Eadweard Æðelstanes broðor et cwæð ic hæbbe Sunnanburges boc ðe uncre yldran me læfdon læt me þæt land to handa ic agife þinne wer ðam cynge þa cwæð Æðelstan þæt him leofre wære þæt hit to fyre oððe flode gewurde þonne he hit æfre gebide ða cwæð Eadweard hit is wyrse þæt uncer naðor hit næbbe þa wæs þæt swa et forbead Byrhferð þæt land Æðelstane et he of ferde et gebeh under Wulfgare æt Norðhealum binnan ðam wendun gewyrda et gewat Eadræd cyng et feng Eadwig to rice et wende Æðelstan hine eft into Sunnanbyrg ungebetra þinga þa geahsode þæt Eadwig cyng et gesealde þæt land Byrnrice et he feng to et wearp Æðelstan ut gemang þam getidde þæt Myrce gecuran Eadgar to cynge et him anweald gesealdan ealra cynerihta þa gesohte Æðelstan Eadgar cyng et bæd domes þa ætdemdon him Myrcna witan land buton he his wer agulde þam cynge swa he oðrum ær sceolde þa næfde he hwanon ne he hit Eadwearde his breðer geðafian nolde þa gesealde se cyng et gebecte þæt land Æðelstane ealdormenn to hæbbenne et to syllanne for life et for legere þam him leofost wære æfter þam getidde þæt Ecgferð gebohte boc et land æt Æðelstane ealdormenn on cynges gewitnesse et his witena swa his gemedo wæron hæfde et breac oð his ende þa betæhte Ecgferð on halre tungan land et boc on cynges gewitnesse Dunstane arcebisceope to mundgenne his lafe et his bearne þa he geendod wæs þa rad se bisceop to þam cynge myngude þære munde et his gewitnesse þa cwæð se cyng him to andsware mine witan habbað ætrecð Ecgferðe ealle his are þurh þæt swyrd þe him on hype hangode þa he adranc nam þa se cyng ða are þe he ahte xx hyda æt Sendan x æt Sunnanbyrg et forgef Ælfhege ealdormenn þa bead se bisceop his wer þam cynge þa cwæð se cyng þæt mihte beon geboden him wið clænum legere ac ic hæbbe ealle þa spæce to Ælfhege læten Þæs on syxtan gere gebohte se arcebisceop æt Ælfhege ealdormenn þæt land æt Sendan mid xc pundum et æt Sunnanbyrg mid cc mancussan goldes unbecwedene et unforbodene wið ælcne mann to þære dægtide et he him swa þa land geagnian derr swa him se sealde ðe to syllenne ahte et hi þam se cyng sealde swa hi him his witan gerehton