Charter Document - 04740046
| Charter Number: | 04740046 |
|---|---|
| Cartulary Title: | Charters of Westminster |
| Charter Language: | English |
| Charter Origin: | Royal |
| Charter Type(s): | Writ |
| Date: | 1062 - 1066 |
| Date type: | Assigned |
| Resource Link(s): |
eSawyer (S 1146) |
Charter:
Eadward kingc gret Ealdred ercebiscop et Wulstan biscop et Wulfwi biscop et ealle mine heafedmen et mine þeignes et mine scirgerefan et ealle mine holde freond on Wigercestrescire et on Glowercestrescire et on Oxonfordescire freondlice Icc kiþe eow þat icc wille et icc ann þæt Sancte Peter et þa gebroðera on Westminstre habben to heora bileofan þa cotlif Perscoran et Deorhirstan mid eallum þan landum et mid eallum þan berwican þe ic habbe for minre saule alesednesse into þare haalgum stowwe gifan et aelc þære þinga þe þær to mid rihte gebirað mid circan et mid milnan mid wuda et mid feldan mid læse et mid hæþe mid mæden et mid eitum mid waterum et mid werum et mid eallum þingum swa full et swa forð swa hi on ealdum dagum into þære socne geled weren oððe me silfan fyrmest on handa stodan And ic anne hem eft alswa þæt hy habben þar to saka et soknæ toll et team infangenne þeof et flemenesfirmðe griðbrice et hamsocne forsteall et miskenninge et ealle oðere gerihtu on eallum þingum þe þær upp aspringað inne tid et ut of tide binnan burh et butan burhge on stræte et of stræte For þæn icc nelle nateshwan geþafian þæt anig man ætbrede oððe geutige mine gife et mine ælmesse swa micell þæt sy an æker landes þæs þe on aeniges mannes dæge into þam cotlifan gebyrede Ne eft þæt þær ænig man aenigne onstingc habbe on ænigum þingan oððe on ænige timan be strande ne be lande buton se abbot et þa gebroðera into þam minstre et ic wille et fæstlice bebeode þæt þæs freodom et þeos mundbirdnesse beo strang et staþelfast into þære halegan stowwe Gode to lofe et Sancte Petre to wurðminte et to gewealde a on ece erfeweardnesse Amen God eow ealle gehealde