Charter Document - 04740042
| Charter Number: | 04740042 |
|---|---|
| Cartulary Title: | Charters of Westminster |
| Charter Language: | English |
| Charter Origin: | Royal |
| Charter Type(s): | Writ |
| Date: | 1053 - 1066 |
| Date type: | Assigned |
| Resource Link(s): |
eSawyer (S 1142) Westminster Abbey Muniments - W.A.M. XVI |
Charter:
Eadward kincg grett Willelm biscop et Harold eorl et Esgar stealre et ealle mine þegnas et mine holde freond on Middelsexan freondlice Ic kyþe eow þæt icc wille et icc ann þæt Sancte Peter et þa gebroðra on Westmynstre habben to heora bileofan þæt cotlif Stana mid þam lande Stæningahaga wiðinnon Lundone et fif et þrittig hida sokne þær to mid eallum þam berwican þe icc habbe for minre sawle alesednysse in to þære halgan stowwe gegyfan et ælcc þære þinga þe þær to mid rihte gebyrað on cyrcan et on mylnan on wuda et on feldan on læse et on hæðe on mædum et on eitum on wæterum et on werum et on eallum þingum swa full et swa forð swa hy on ealdum timan in to Stana sokne geled wæron oððe me selfan fyrmest on handa stodan And icc ann heom eft ealswa þæt hy habben þær to sake et sokne toll et team infangeneðeof et flemenefyrmðe griðbryce et hamsokne forsteall et miskænninge et ealle oþre gerihtu on eallum þingum þe þær upp aspringað inne tid et ut of tide binnan burh et butan burhge on stræte et of stræte For þan icc nelle nateshwon geþafian þæt ænig man ætbrede oððe geutige mine gyfe et mine ælmesse swa mycel þæt sy an æker landes þæs þe on æniges mannes dægge in to þam cotlifan gebyrede oððe þæt þær ænig man ænigne onstyng habbe on ænigum þingum oððe on ænige timan be strande ne be lande buton se abbod et þa gebroðra to þas mynstres neode et icc wille et fæstlice bebeode þæt þeos mundbyrdnesse beo strang et staþelfæst in to þære halgan stowwe a on ece erfeweardnesse Amen God eow ealle gehealda