Charter Document - 04650010
| Charter Number: | 04650010 |
|---|---|
| Cartulary Title: | Charters of Ramsey |
| Charter Language: | English |
| Charter Origin: | Royal |
| Charter Type(s): | Writ |
| Date: | 1055 - 1065 |
| Date type: | Assigned |
| Resource Link(s): |
eSawyer (S 1110) |
Charter:
Eadward cing gret wel Wulfwi biscop et Tosti eorl et Norðman scirrefe et ealle his witen et ealle his holden inne Hamtunescire hadede et leawede freondlice et ic cyðe eow þæt Ælfwine abbod of Ramesege et Leofric abbod of Burh habben me gecyd of þæt hwærf et of þa forewarde þe heo habben gespeken et gedon heom betweonan et ic wylle þæt ge understanden þæt Ælfwine abbod of Ramesege on þas wise hafð gehwærfd æt Leofrice abbod of Burh nigen gerde landes æt Ludintune of Sanctus Petrus socnelande of Burh Huntinges hide be name et Godrices twa gerde þe Densce et Brandes gerde et Leofgares gerde et Ælfwines gerde þe Blace scer et sacleas to fulle hwærfe wið æfric man ær dæige et æfter dæige et hafð gifen him þær fore þæt land æt Mærham al ðæt Sanctus Bendictus þær ahte scer et sacleas wið æfric man to fulle hwærfe et toæken þis þe abbod et þa gebroðra of Ramesege sculen gifan ælce gere feower þusend æl inne lenten to cariteð þon abbode et þam gebroðre in to Burh To þære forwarde þæt þe abbod et þa gebroðra of Ramesege sculen habben of Sanctus Petrus landare wercstan æt Bernace et walstan æt Burh alswa mycel swa heom behofeð to fulle forewarde scer et sacleas wid toll et wid ealle þing be wætere et be lande in to Ramesege æfre mare et heo habben me gecyd þæt þis forewarde wæs imaked on Leofsies abbodes iwitnesse of Eli et Wulfgeates abbodes of Crulande et on þære manne þe heom mide wæren Nu cyðe ic eow þæt Ælfwine abbod hafð swa wið me gespeken et of his me igefen þæt ic habbe þis ilce forewarde igeated et ic wille þæt hit stande al swa heo hit gespeken habbeð Gode to lofe et Sancta Maria et Sancte Benedihte æfre mare wið borene et wið unborene et ic hate et beode þæt nan man ne wurðe swa deorf ne swa dyrsti þæt þis ilce hwærf et þis ilce forwarde breke haded ne leawed et ic forbeode be fulle wite þæt nan man ne wurðe swa dyrsti þæt Sanctus Benedihtus men ne heore þing nahwær ne derie ac Godes grið et min habben heo et heore þing be wætere et be lande et ic hæte et beode mid þis ilce writ þæt þæt ilce mærke et mære æfter Cnutes delfe kinges stande alswa Ælfwine abbod of Ramesege hit betalde wið Siwarð abbod of Þornege æl beo þe Gangestyde be east halfe þam dælue et be west halfe be Hyndelake swa anan to Wendelesmere et healf Ragereholt in to Ramesege On Leofsies abbodes iwitnesse of Eli et on Leofrices abbod of Burh et Wulfgeates abbod of Crulande et þare manne þa heom mide wæren et gif æniman þis ilce forewarde mid ænige þinge abreke et awansige si he gesyndred fram heofenerices myrhðe butan he hit ibete ær he heonan gewite Amen Þis writ wæs imaked æt Westmunstre on Sanctus Petrus mæssedæi on Stigandes iwitnesse ercebiscop et Edwines abbod et Haroldes eorles et Esegares stalres et Hugelines burðeines