Charter Document - 04510002
| Charter Number: | 04510002 |
|---|---|
| Cartulary Title: | Charters of Eynsham |
| Charter Language: | English |
| Charter Origin: | Religious |
| Charter Type(s): | Agreement |
| Date: | 1053 - 1055 |
| Date type: | Assigned |
| Resource Link(s): |
Bodleian Library - Christ Church MS 341 (f9v) eSawyer (S 1478) |
Charter:
[H]er swutelað on þisan gewrite hu þa forewearde geworhte syndon þe Wlwig bisceop et Leofric eorl et Godgife þæs eorles wif geworhtan ymbe þæt mynster æt sancte Marian stowe Þæt is ærost þæt hig bædan þone bisceop þæt hig mostan þæt mynster godian et land þiderinn tolecge be his fullre leafe Þa tyðede heom se bisceop et wæs swyðe bliðe þæt he ænigne fultum hæfde þæt him þærto fylstan wolde Nu habbað hig hit gesett mid preostan et willað þær habban þeowdom eallswa man hæfð on Paulesbyrig binnan Lundene et þa land þe hig þiderinn lecgeað beon þa þam gebroðran þe þær binnan beoð to fodnoðe et to scrude et se bisceop habbe into his feorme ælc þæra þinga þe Æðeric bisceop et Ædnoð bisceop hefdan ætforan him of ðam þe mid rihte gebyrað into his bisceoprice þæt is þa twegen deles ælc þæra þinga þe kymð into ðam mynstre et þa preostas habban þone þriddan dæl forutan þam twam mæssan Ðonne habbe se bisceop eall þæt þærto kymð ehta dagas to ðære ærre sancte Maria mæssan et ehta dagas to ðære æftran sancta Marian mæssan butan þam mete anum Þonne habban þa preostas þone þriddan dæl of ðam mete þe þærto kymð et þa land þe se bisceop et se eorl et Godgife et gode menn þiderinn geunnað beon þa æffre into ðæra halgan stowe þam gebroðran to neode et þæt mynster to godianne þæt nan bisceop þe æfter him kymð þærof nane feorme ne crafige butan of ðam þe him mid rihte to gebyrað into his bisceoprice eallswa oðre bisceopas ær ætforan him hæfdon et þis is gedon be Eadweardes cynges fullra leafe et on his gewitnesse et on Eadgyðe his gebeddan et on Stigandes arcebisceopes et on Kynsiges arcebisceopes et on Heremannes bisceopes et on Dodika bisceopes et on Leofrices bisceopes et on Ealdredes bisceopes et on Heka biscropes et on Ægelmæres bisceopes et on Alfwoldes bisceopes et on Willelmes bisceopes et on Leofwines bisceopes et on Sigweardes eorles et on Haroldes eorles et on Raulfes eorles et on Ælfgares eorles et on Manniges abbudes et on Ælfwines abbudes et on Leofsiges abbudes et on Leofrices abbudes et on oðres Leofsiges abbudes et on Brihtmæres abbudes et on Esgeres stealres et on Raulfes steallres et on Lifinges steallres et on eallra þæs kynges huscarlan et on his mæssepreostan et on Þurgodes lagen et on Sigferðes et on Godrices et on Owines et on Sigrices et on eallra þara burhware gewitnesse on Lincolne et on eallra þæra manna þe seceað gearmarkett to Stowe et se ðe ða geferædene mid gode geece God ælmihtig geece his lifdagas her on life et on þam toweardan life þæt he mote wununga habban mid Godes gecoranan et se ðe hig todræfe et þa land ut of ðære halgan stowe geutige adrefed wurðe he fram Gode et fram sancta Marian et fram eallan his halgan o[n] ðam myclan domes dæge Nu syndon þisse gewrita þreo an is mid þæs kyngces haligdome et oðer is mid Leofrice eorle et þætte þridde is mid þam bisceope on ða halgan stowe