Charter Document - 04500034
| Charter Number: | 04500034 |
|---|---|
| Cartulary Title: | Charters of Exeter |
| Charter Language: | English |
| Charter Origin: | Religious |
| Charter Type(s): | Will |
| Date: | 1008 - 1012 |
| Date type: | Assigned |
| Resource Link(s): |
eSawyer (S 1492) |
Charter:
+ Þis is Alfwoldes bisceopes cwyde þæt is ðæt he geann þæs landes æt Sandforda in to þam mynstre in to Crydian tune him to saulsceatte mid mete et mid mannum swa hit stent butan witeþeowum mannum et anes hiwscypes he geann Godrice þærof et an sylhðe oxna et he geann his hlaforde feower horsa twa gesadelode et twa unsadelode et feower scyldas et IIII spera et twegen helmas et twa byrnan et L mancsa goldes þe Ælfnoþ him sceal æt Wudeleage et ænne scegð LXIIII ære he is eall gearo butan þam hanon he hine wolde ful gearwian his hlaforde to gerisnum gif him god uðe et Ordulfe twegra boca Hrabanum et martyrlogium et þam æþelinge XL mancsa goldes et þæra wildra worfa æt Æscburnan lande et twegra getelda et Alfwolde munuce XX mancsa goldes et anes horses et anes geteldes et Byrhtmære preoste XX mancsa goldes et anes horses et his þrim magon Eadwolde et Æþelnoðe et Grimkytele hira ælcon XX mancsa goldes et hira ælcon anes horses et Wulfgare his mæge twegra wahryfta et twegra setlhrægla et þreo byrnan et Godrice his aðume twegra byrnena et Eadwine mæssepreoste V mancsa goldes et his kæppan et Leofsige mæssepreoste þæs mannes þe he him ær tolet Wunstan hatte et Kenwolde helm et byrnan et Boian anes horses et Mælpatrike V mancsa goldes et Leofwine Polgan V mancsa goldes et Ælfgare writere an pund penega he lænde Tune et his geswysternon gehealdon hi hine et Eadgyfe his swyster an strichrægl et I hrigchrægl et I sethrægl et Ælflæde offestran V mancsa penega et Spilan III mancsa goldes et LX penega et Leofwine Polgan et Mælpatrike et Byrhsige hira þreora ælcon an hors et ælcon hiredmen his onrid þe he alæned hæfde et his hiredcnihton eallon V pund to gedale ælcon be þam þe his mæð wære et in to Crydian tune þreo þeningbec mæsseboc et bletsungboc et pistelboc et an mæssereaf et on ælcon bisceophame ælcon men freot þe witeþeow wære oðþe he mid his feo gebohte et in to Wiltune calic et disc on CXX mancsa goldes butan þrim mancsa et burþenon his beddreaf et þises is to gewitnesse Wulfgar Ælfgares sunu et Godric be Crydian et Eadwine mæssepreost et Alfwold munuc et Byrhtmær preost