Charter Document - 04500031
| Charter Number: | 04500031 |
|---|---|
| Cartulary Title: | Charters of Exeter |
| Charter Language: | English |
| Charter Origin: | Religious |
| Charter Type(s): | Letter |
| Date: | 0981 - 0988 |
| Date type: | Assigned |
| Resource Link(s): |
Anglo Saxon Charters (S 1296) eSawyer (S 1296) |
Charter:
+ þis gewrit sendeþ se arcebisceop his hlaforde Æþelrede cynge Hit gelamp þæt Westwealas onhofon hi ongean Ecgbriht cyng þa ferde se cyng þyder et gewylde hi et geteoþude þone erd et ateh swa him þuhte Sealde þa inn to Scireburnan þreo land Polltun Cællwic Landwiþan et þæt swa þa stod wintra þrage oþ hæþene herias þysne eard ofor eodun et gesætun Þa wearþ oþer tid æfter þan þæt lariowas afeollun et ut gewitun of Angla lande for þære geleafleste þe him þa onsæge gewearþ et stod eall Westsexena rice VII gear buton bisceope Þa sende Formosus se papa of Romebyrig et gemyngude Eadweard cyng et Plegmund arcebisceop þæt hi þæt gebetun et hi swa dydun mid geþeahte þæs papan et eall Angelcynnes witena gesettun V bisceopas þær ær wærun twegen anne æt Wintancestre þæt wæs Fryþestan oþerne to Hremnesbyrig þæt wæs Æþelstan þriddun to Scireburnan þæt wæs Wærstan feorþan to Wyllun þæt wæs Æþelm fiftan to Cridiantune þæt wæs Eadulf et him mon betæhte þa þreo land on Wealan to innstinge inn to Defenun forþam þe hi ær þam unhyrsume wæron buton Westseaxena ege et Eadulf bisceop þyssa landa breac his lifes tida Æþelgar bisceop æfter him eall swa Þa gelamp hit þæt Æþestan cing sealde Cunune bisceoprice ealswa Tamur scæt et Þa gelamp þæt Eadræd cyng het hadian Daniel et betæhte þa land swa him witan ræddun inn to sancte Germane to þam bisceopstole Æfter þam þa Eadgar cyng me het þæt ic Wulfsige hadude þa cwæþ he et ealle ure bisceopas þæt hi nystun hwa rihtlucur þa land ahte þonne þære scire bisceop þa he innhold wæs et Godes geleafan on riht bodude et his hlaford lufude Gyf þonne þes bisceop nu swa deþ ic nat hwy he ne sy þara landa wyrþe gyf him heora God ann et ure hlaford forþan us ne þincþ þæt hi ænig man rihtlicor age þonne he et gif hi ænig man him to teo hæbbe hi butan Godes bletsunge et ure