Charter Document - 04480004
| Charter Number: | 04480004 |
|---|---|
| Cartulary Title: | Charters of Ely |
| Charter Language: | English |
| Charter Origin: | Royal |
| Charter Type(s): | Confirmation |
| Date: | 0970 |
| Date type: | Assigned |
| Resource Link(s): |
eSawyer (S 779) |
Charter:
Gode ælmihtigum rixiende ðe ræt et gewissað eallum gesceaftum þurh his agenne wisdom et he ealra cininga cynedom gewylt Ic Eadgar cining eac þurh his gife ofer Engla þeode nu up aræred et he hæfð nu gewyld to minum anwealde Scottas et Cumbras et eac swylce Bryttas et eall þæt ðis igland him on innan hæfð þæt ic nu on sibbe gesitte minne cynestol hohful embe þæt hu ic his lof arære ðe læs ðe his lof alicge to swyðe nu on urum timan þurh ure asolcennysse ac ic wille nu þurh Godes wissunge þa forlætenan mynstru on minum anwealde gehwær mid munecum gesettan et eac mid mynecenum et Godes lof geedniwian ðe ær wæs forlæten Criste wissiendum ðe cwæð þæt he wolde wunian mid us oð þissere geendunge et þa munecas libban heora lif æfter regole þæs halgan Benedictes us to þingunge þæt we þone hælænd habban us glædne et he us gewissige et urne eard gehealde et æfter geendunge þæt ece lif us forgife Nu is me on mode æfter mynegungum Atheluuoldes biscopes þe me oft manode þæt ic wille goodian ðurh Godes silfes fultum þæt mynster on Elig mid agenum freodome et sinderlicum wurðmynte et siððan mid æhtum þam to bigleofan þe we gelogiað þær to Godes ðeowdome þe ðær simble wunion Seo stow wæs gehalgod iu fram ealdum dagum þam halgan Petre to wyrðmynte ðæra apostola yldost et heo wæs geglengd þurh Godes sylfes wundra þe gelome wurdon æt Atheldrythe byrgene þæs halgan mædenes þe ðær gehal lið oð þis on eall hwittre ðryh of marmstane geworht be hyre we rædað hu heo her on liue wæs et hu heo Gode ðeowode on godre drohtnunge et be hyre geendunge et hu heo up adon wæs ansund of hyre byrgene swa swa Beda awrat Engla þeodæ lareow on his larbocum Nu wæs se halga stede yuele forlæten mid læssan ðeowdome þonne us gelicode nu on urum timan et eac wæs gehwyrfed þam cyninge to handa ic cweðe be me sylfum ac Atheluuold bisceop þe his min rædbora et soð Godes freond sealde me to gehwærfe þone ham Heartingas on sixtigum hidum wið þam mynster lande þe lið into Helig et ic þa geeacnode into Elig mynstre þas ðry hamas ðe þus sind gehatene Meldeburna Earningaford Norðwold et he þær rihte mid minum ræde et fultume mid munecum gesette þæt mynster æfter regole et him ealdor gesette us eallum ful cuðne Brihtnoð gehaten þæt he under him þane halgan regol for Gode geforðade æfter mynsterlicum þeawe Ða gelicode me þæt he hit swa gelogode mid Godes þeowum Gode to lofe et ic þa geeacnode to þære ærran sylene tyn þusenda elfixa ælce geare þam munecum þe me for fyrdinge gefyrndagum aras binnan þam iggoðe of þam folce æt Wyllan et ealla þa socna eac ofer þæt fennland into þam twam hundredum him to scrudfultume et on east Englan æt Wichlawan eac ealle þa socna ofer fif hundredum et ofer ealle þa land gelice þa socna þe into þam mynstre nu synd begytene oððe ða þe him gyt becumað þurh Cristes foresceawunge oððe þurh ceap oððe þurh gife habban hi æfre on eallum þa socne et þone feorðan pening on folclicre steore into Grantanbricge be minre unnan et gif ænig mann þiss awendan wylle þonne gange eall seo socn þe to anre niht feorme gebyreð into þære stowe et beo þis priuilegium þæt is sindorlice wyrðmynt oððe agen freodom into þære stowe mid eallum þisum ðingum Gode geoffrod mid urum goodum willan Gode æfre frig et Godes halgum for minre sawle et minra yldrena us to alysednesse swa þæt nan þæra cyninga ðe cumað æfter me oððe ealdorman oððe oðer rica mid ænigum riccetere oððe unrihte þiss ne awende odde gewanige be þam þe he nelle habban Godes awyrgednysse et his halgena et minne et minra yldrena þe þas ðing fore synd gefreode on ecum freote on ecnysse AMHN