Charter Document - 04410035

Ælflæd gæswytelaþ on þis gewrite hu hæo wile habban gefadad hiræ æhta for gode et for worldæ Ærest þæt ic an minum hlaforde þara VIII landa æfter minum dege þæt is erest æt Douorcortæ et æt Fulanpettæ et æt Ælesforda et æt Stanwægun et æt Byrætune et æt Læxadyne et æt Ylmesætun et æt Bucyshealæ et twægra bæha on twera punda gewihte et twa sopcuppan et an sæolfran fæt et þæ leof æadmodlice bidde for godes luuan et for mines hlafordæs sawle lufan et for minræ swystor sawlæ lufan þæt þu amundie þa halgan stowæ et Stocæ þæ mine yldran on restaþ et þa are þæ hi þiderin sæadon a to freogon godæs rihte þæt is þonno þæt ic gean æalswa mine yldran his er gæuþan þæt is þonne þæt land æt Stoce into þeræ halagan stowæ et æal þæt þæt þær to tunæ gæhyrð et þonæ wuda æt Hæþfælda þæ min swystar gæuþæ et mine yldran þonne synd þis þa land þæ minæ yldran þærto bæcwædon ofær minre swystor dæg et ofær minne þæt is ðonne Stredfordæ et Fresantun et Wiswyþetun et Lauanham et Byliesdyne et Polstyde et Wifærmyrsc et Grænstydæ et Peltandune et Myræsegæ et þæt wudæland æt Totham þæ min fæder geuþæ into Myresiæ et Colne et Tigan þonne synd þis þa land þe minæ yldran becwædon into oþrum halgum stowum þæt is þonne into Cantwarabyrig to Cristæs circan þan hired to brece þes landes æt Illanlege et into Paules mynstre into Lundene þes landes æt Hedham to biscophame et þes landes æt Tidwoldingtune þan hirede to brece into Paules mynstre et into Beorcingan þam hirede to brece þes landes æt Babbingþyrnan et ic gean Ælfþræðe minæs hlauordæs medder Wuduhamæs æftær minum dæge et æfter hiræ dege gange hit into sancta Marian stowæ into Beorcingan æalswa hit stænt mid mæte et mid mannum et ic gæan into [s]ancte Æadmunde þara twegra landa Cæorlesweorþæ et Cochanfelde þam hirede to bre[ce] æalswa mine yldran his er geuþan et þæs landes æt Hnyddinge æftær Crawan degæ miræ magan et ic gæan into Myresie æfter minum degæ ealswa min hlaford et min swester geuþan þæt is Fingringaho et þara six hida þæ þæt mynstær on stent et ic gæan ef[te]r Crawan dege þes landes æt Wealdingafelda into Suðbyrig to sanctæ Gregoriæ ealswa min swestar hit er foræwyrde et ic gean into Ælig sanctæ Petre et sanctæ Æþældryþe et sancte Wihtburhe et sanctæ Sexburhe et sancte Æormenhilde þer mines hlafordes lichoma rest þara þreo landa þe wit buta geheotan gode et his halga[n] þæt is æt Rettendune þe wes min morgangyfu et æt Sægham et æt Dictune ealswa min hlaford et min swæstar his er geuþan et þaræ anre hide æt Cæafle þe min swystar begeat et þes bæahges gemacan þe man sæalde minum hlaforde to sawlescæatte et ic gean Æðelm[æ]re æaldorman þes landes æt Lellinge ofer mine deg mid mete et mid mannum æalswa hit stent on þet gerad þæt he beo on minum life min fulla freod et forespreca et mira manna et efter minum dege beo þara halgan stowe et þeræ are ful freod et forespeca æt Stocæ þe mine yldran on restaþ et ic gean þes landes æt Lissingtune Eðelmere mines [] e mid mete et mid mannum ealswa hit stent et hine eadmodlice bidde þæt he min fulla freod et mundiend beo on minum dege et efter minum dege gefelste þæt min cwide et mira yldran standan mote þis sind þa landmearca to Byligesdyne of ða burnan æt Humelcyrre fra[m] Humelcyr[re] [] Heregeresheafode fram Heregeresheafode æfter ðam ealdan hege to ðare grene æc þonne forð þæt hit cymð to þare stanstræte of þare stanstræte andlang scrybbe þæt hit cymð to Acantune fram Acyntune þæt hit cymð to Rigendune fram Rigindune æft to þara burnan et þær Is landes fif hida þis sind þa landgemæra to Hwifermirsce et to Polestede of Loppandune to Scelfleage fram Leage to Mercyl andlang Mercyl into Sture andlang Sture to Leofmannes gemære andlang Leofmannes gæmære to Amalburnan fram Amalburnan to Norðfelda ðonne forð to Bindhæcce fram Bindhæcce to Tudanhæcce fram Tudanhæcce to Giddincgforda fram Giddingforda to Hnutstede fram Huntstede to Hwitincgho fram Hwitingho to Wudemannestune fram Wudemannestune to [Cær]esige gæmære fram Cæresige gemære to Hædleage gemære fram Hædleage gæmære to Hligham gemære Fram Hligham gemære eft to Loppandun