Charter Document - 04340044
| Charter Number: | 04340044 |
|---|---|
| Cartulary Title: | Salzburg, Erzstift (798 - 1806 [1350]) |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 1195 |
| Date type: | Assigned |
| Resource Link(s): |
Monasterium.net |
Charter:
Henricus dei gratia Romanorum imperator et semper Augustus et rex Sicilie universis fidelibus suis per totum archiepiscopatum Salzburgensem constitutis gratiam suam et omne bonum Vestre universitati significamus quod in presentia nostre maiestatis iudicatum est et sententia lata quod nullus omnino per totum archiepiscopatum Salzburgensem monetam cudere debeat in forma monete Salzburgensis nisi tantum monetarii archiepiscopi Salzburgensis hii scilicet quibus ipse hoc faciendum commiserit Quam sententiam ratam habentes et confirmantes precipimus ut nullus omnino in toto archiepiscopatu Salzburgensi presumat monetam cudere in forma monete predicte Quod quicumque fecerit nos iudicamus eum falsarium et denuntiamus et quicquid fidelis noster Salzburgensis archiepiscopus de talibus fecerit nos ratum habebimus et ubicumque idem archiepiscopus per se vel per suos nuntios super talibus querimoniam deposuerit precipimus omnibus fidelibus nostris ut plenam inde fatiant iusticiam Ad hec precipimus districte ut argentum quod a montibus et villis et aliis quibuscumque locis ad monetam archiepiscopi Salzburgensis deferri consuetum secundum consuetudinem illuc deferatur et in hoc nullus eidem archiepiscopo perstet impedimentum vel inferat iniuriam et si archiepiscopus super hoc facto aliquem excommunicaverit per ecclesiasticam censuram nos eundem proscribimus et haberi fatiemus tamquam proscriptum Dat apud Mediolanum in kalendis iunii