Charter Document - 04340023

In nomine sancte et individue trinitatis Notum sit universitati fidelium qualiter ego sancte Salzburgensis ecclesie per misericordiam dei archiepiscopus Conradus sopitis adversitatibus et pacis tranquillitate concessa assumptis mecum aliarum ecclesiarum venerabilibus episcopis Conone videlicet Ratisponensi atque Ekberto Monasteriensi prudentia fundatis consilii auctoritate claris virtutum honestate conspicuis ecclesie nostre cum eis in futurum providere cepi quatinus si qua in ecclesia domini a nobis apostolica veritate dei adiutoribus dictis utiliter laborata fuissent rata et inconvulsa perpetuo haberentur mutanda mutarentur corrigenda corrigerentur Porro si qua minus vigilante sollicitudinis nostre diligentia neglecta penitus fuerant ubi occurrere potuerunt transire noluimus ut in medium prolata ad normam rectitudinis cum aliis ducerentur Ubi clero nostro atque ex laicorum numero Engilberto duce Carinthie aliisque quam plurimis monentibus venit ad memoriam Gurcensem ecclesiam adhuc carere iure ac privilegio dignitatis sue que a die fundationis sue preter insigne episcopalis nominis et officii nec terminum parrochie nec aliud quicquam optinuerat quamvis beate memorie predecessori nostro Gebebardo iam dudum fuisset a domino Gregorio VII papa iniunctum quatinus sicut pie ceperat pre amplitudine sua portionem parrochie sue decidendo et episcopatum statuendo ita devote expleret Cui precepto explendo quoniam iam dudum oportunitas nulla fuerat tam ipsi qui idem preceptum acceperat Gebebardo quam post eum omnibus episcopis usque ad nos qui etiam sicut alii antea nonnullas diu tribulationes pertulimus nos domini apostolici mandatum tanquam nobis factum accipientes accepto ocio statim implere curavimus Anno itaque ab incarnatione domini millesimo CXXXI designavimus Gurcensi ecclesie atque eius episcopo venerabili Hildiboldo terminum parrochie presentibus atque ut id fieret magna devotione et studio insistentibus supradictis venerabilibus episcopis Ratisponensi et Monasteriensi nec non cum duce Engilberto clero ac populo Qui terminus est ab ipso loco qui Gurca dicitur sicut aqua eius nominis decurrit usque ad terminum quo dividitur parrochia Frisach et illa que vocatur Lvbedingen atque inde sicut earundem parrochiarum terminus est usque ad parrochias Wstrize et Motnize quas et ipsas cum terminis suis ambas pertinere decrevimus ad eundem terminum preter quod decimas que Motnize colliguntur iam dudum in usus pauperum ad hospitale contulimus quo eas adhuc pertinere volumus Item terminum eundem demonstrat via que contra ecclesiam sancte Radegundis cum vado transit suppradictam aquam Gurcam et montem qui vocatur Drasenberk ac per medium ville sancti Viti indeque in eum locum ubi aqua que dicitur Wstrize media iungitur aque que Glane vocatur Tenditque idem terminus contra decursum eiusdem fluminis Wstrize usque ad parrochiam Zomolsperk que et ipsa tota ad eundem terminum pertinet usque ad summitatem alpium que Glodenizeberk nomen habent Acta sunt hec Salzburg sub domino Innocentio apostolatus eius anno secundo regni Lotharii regis tercii septimo pontificatus vero nostri XXVI presentibus collaudantibus atque confirmantibus religiosis viris abbatibus scilicet omnibusque eiusdem sedis canonicis et multa tam nobilium quam ministerialium ecclesie turba Data Salzbur XVI kalend augusti indictione VIIII