Charter Document - 04330084
| Charter Number: | 04330084 |
|---|---|
| Cartulary Title: | Geschichte des Salzburger Domkapitels 831 - 1300 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1194 |
| Date type: | Internal, Calendar, Papal |
| Resource Link(s): |
Monasterium.net |
Charter:
Celestinus episcopus servus servorum dei venerabili fratri Alberto Salzburgensi archiepiscopo apostolice sedis legato salutem et apostolicam benedictionem Quoniam ex iniuncte nobis servitutis officio tenemur ad universos tam vicinos quam longe positos aciem nostre considerationis extendere et in hiis que dei sunt quantum nobis divina gratia ministrare voluerit providere cum universi prout expediret nostram nequeant adire presentiam necesse habemus quibusdam de fratribus et coepiscopis nostris de quorum fide et industria plenarie confidamus honestante sollicitudinis impertiri Inde siquidem est venerabilis in Christo frater quod taxatis viarum periculis et tam multiplicibus impedimentis que provenire possunt presertim in huius malitia temporis illis qui de tam remotis partibus necesse habent ad sedem apostolicam laborare tibi per universam provinciam tuam de fratrum nostrorum consilio legationis officium de prudentia tua fideique sinceritate quam erga nos et ecclesiam Romanam geris plurimum confidentes impendimus presentium auctoritate mandantes ut vice nostra que corrigenda videris auctoritate apostolica corrigas et emendes et que bene disposita sunt foveas et conserves que vero prava vel a rectitudinis tramite deviare cognoveris ad statum satagas reducere meliorem Sententias etiam quas in contumaces rationabiliter tuleris aut rebelles usque ad emendationem debitam firmitatem volumus omnimodam obtinere Dat Lateran XII kal februarii pontificatus nostri anno tercio