Charter Document - 04330081

In nomine sancte et individue trinitatis Otacher dei gracia dux Stirensis Gvndaforo Salzbvrgensi preposito et eiusdem ecclesie canonicis in perpetuum Si nos qui pre ceteris secularibus preminmus diviciis de rebus nostris hereditariis loca sacra ditare et personas nobis religiosas iubemur conciliare multo magis necessarium et saluti anime nostre salubrius esse iudicamus ut ea que parentes nostros sanctis ecclesiis pro eterne retributionis premio contulisse cognoverimus nos quoque eisdem ecclesiis nostre privilegio donationis stabiliamus et si qua ex his aliquo possessionis titulo minus bono in nostra possessione remansisse intellexerimus suis illa possessoribus legitimis restituamus Eapropter omnium tam presentium quam futurorum memorie volumus esse conpertum qualiter nos autentico patris nostri Otachri Stirensis marchionis privilegio inspecto ex tenore eiusdem privilegii donationem ipsius patris nostri et domne Chunigundis cometisse amite sue quam de villa Werchendorf super Drauum fluvium sita ad canonicos Salzburgensis ecclesie maioris fecerant plenarie et veraciter intelligentes animum ad hoc promptum et voluntarium firmiter intendimus ut paternam donationem eisdem canonicis omni quo possemus modo roboraremus et stabiliremus Sane dum in procinctu Ierosolimitani itineris quod cum aliis plurimis principibus et viris nobilibus ac illustribus pro liberando a Sarracenis sancto domini sepulchro aggressi fueramus essemus constituti pro diversis nostris negociis diffiniendis una cum dilecto consanguineo nostro Liupoldo duce Austrie quem rerum nostrarum si sine sobole decederemus constitueramus heredem in villam nostram celebrem Ense dictam venientes cum iam dictum predium Werchendorf quasi ex hereditario iure adhuc in nostre teneremus proprietatis possessione tandem ex dilecti amici nostri domni Gundachri tunc Salzburgensium canonicorum venerabilis prepositi querimonia frequenti ex ministerialium etiam nostrorum ammonitione fideli precipue quoque ex predicto patris nostri marchionis privilegio induc[ti] et ammoniti pretaxatis domno videlicet Gundachro et canonicis Salzburgensibus iusticiam suam in ipso predio Werchendorf recognoscere decrevimus Ipsum itaque predium villam scilicet Werchendorf super Drauum sitam cum omnibus suis pertinentiis cultis et incultis quesitis et inquirendis campis pratis pascuis silvis aquis aquarumque decursibus molendinis molendinorumque locis exitibus et reditibus cum omni qua nos et parentes nostri ibidem habuerunt utilitate et proprietate pro remedio anime nostre et parentum nostrorum deo et ecclesie sancti Rudberti in usus et proprietatem Salzburgensium canonicorum prememorato consanguineo nostro Liupoldo Austrie duce consentiente et ad maiorem nostre delegationis auctoritatem et robur manum suam nostre manui apponente manu potestativa in presentia multorum nobilium et honoratorum virorum delegavimus et presentis carte privilegio ipsis recognovimus et in posterum eis confirmavimus ea condicione ut post mortem nostram sive heredem sobolem habuerimus sive sine herede sobole decesserimus predicti canonici ipsam villam nullius pacto exceptionis deinceps interveniente perpetuo tempore in suorum usuum omnimoda proprietate totaliter et quiete possideant et eo devotius et frequentius pro nobis nostrisque parentibus apud deum intercedant Ad maiorem vero huius nostre traditionis stabilitatem mansum unum de iam dicta villa Werchendorf eisdem canonicis pro signo investiture que vulgo gwere dicitur possidendum in presenti et in proprietate omnimoda tenendum donavimus quatinus et per hoc omne os iniqua loquentium contra eos obstruatur et maior eis possessionis et proprietatis firmitas in futurum conquiratur Ut autem hec nostra traditio sive recognitio iam dictis canonicis Salzburgensibus firma et stabilis omni iugiter evo permaneat hanc cartam inde conscriptam tam nostro sigillo quam prememorati ducis Austrie sigillo insigniri et roborari fecimus Testes quoque qui interfuerunt placuit conscribi qui sunt hii Engilbertus comes de Gorz Fridericus advocatus de Perge Otto de Lengebach Pilgrimus de Pvcheim Hadmarus de Chunringen Arnoldus de Wartenburch Herrandus de Wildonia Offo de Tiufenbach Olricus de Chustelwanch Perngerus de Chappelle Dietmarus et Olricus de Putnowe Otto de Volchensdorf Richerus de Marchburch Liutwinus de Svnnenberch Dietmarus de Liehtensteine Gundacher de Stiria Duringus de Emerberch Olricus de Starchenberch Fridericus de Miersdorf Engilscalcus Huzinger Fridericus de Schatowe Wulfingus camerarius