Charter Document - 04330072

Alexander episcopus servus servorum dei venerabili fratri Conrado Salzburgensi archiepiscopo eiusque successoribus canonice substituendis in perpetuum Suscepte amministrationis officium nos hortatur fratres et coepiscopos nostros sincera caritate diligere et servare illibatas a predecessoribus nostris concessas eorum ecclesie dignitates Ea propter venerabilis in Christo frater archiepiscope tuis iustis postulationibus clementer annuimus et felicis memorie Iohannis et Alexandri Romanorum pontificum vestigiis inherentes ecclesiam Salzburgensem cui auctore deo preesse dinosceris sub beati Petri et nostra protectione suscipimus et presentis scripti privilegio communimus statuentes ut quascumque possessiones quecunque bona eadem ecclesia in presentiarum iuste et canonice possidet aut in futurum concessione pontificum largitione regum vel principum oblatione fidelium seu aliis iustis modis prestante domino poterit adipisci firma tibi tuisque successoribus et illibata permaneant Porro utendi pallio intra missarum sollempnia in Cena domini in Sabbato magno in die Resurrectionis et Ascensionis in Pontecosten in festivitate sancti Iohannis baptiste et natali apostolorum Petri et Pauli et omnium apostolorum in assumptione nativitate et purificatione beate Marie in festivitate omnium sanctorum in sollempnitate sanctorum quorum in ecclesia vestra corpora requiescunt in natali domini in epiphania in dedicatione ecclesie et ordinatione clericorum et consecratione episcoporum liberam tibi tuisque successoribus concedimus facultatem Crucem quoque ante vos ferendi et in stationibus festivis super nactum equitandi licentiam habeatis Adicimus preterea ut si quid in ecclesia tua vel suffraganeorum tuorum evenerit quod iudicium apostolicum vel apostolici legati presentiam expetat et tanta fuerit necessitas ut expectare hoc nulla valeat ratione vice nostra diffinias ea tamen in hoc et supradictis mensura servata qua antecessores tuos usos esse per privilegia ecclesie recognosces Gurgensem preterea episcopatum qui de concessione antecessorum nostrorum Romanorum pontificum a Geboardo quondam predecessore tuo noscitur constitutus tibi tuisque successoribus auctoritate apostolica confirmamus ita quidem ut episcopatus ille Salzburgensi ecclesie nullo umquam tempore subtrahatur et nullus ibi episcopus quandoque sive per investituram ut dicit assolet vel quocunque alio pacto statuatur nisi quem ad modum a predecessoribus nostris rationabili providentia statutum est et hactenus observatum non obstante quod de Romano Gurgensi episcopo tempore scismatis a nobis permissum fuisse dignoscitur Indignum est enim ut quod studio pietatis apostolica confirmat auctoritas in detrimentum debeat prescripte ecclesie quomodolibet redundare Apostolicam quoque vicem tibi tuisque successoribus in tota Norica provincia concedimus sicut predecessores tui a nostris usque modo firmam antecessoribus habuerunt Ceterum quia de usu palii fecimus mentionem et ignominiosum est si ornari pallio querat moribus indecorus hortamur fraternitatem tuam quatinus studio totius sollicitudinis elabores ut tibi cuncta morum ornamenta conveniant quo etiam auctore deo rector ubique possis esse conspicuus Itaque vita tua filiis tuis sit regula in ipsa si qua tortitudo in illis se iniectaverit dirigant in ea quod imitentur aspiciant in ipsa se semper considerando proficiant ut tuum post deum videatur bonum esse quod vixerint Misericordiam prout virtus patitur pauperibus exhibe oppressis defensio tua subveniat opprimentibus moderata ratio contradicat nullius faciem contra iustitiam accipias nullum querentem iusta despicias sed his omnibus uti salubriter poteris si magistram caritatem habueris Ecce frater karissime inter alia multa ista sunt sacerdotii ista sunt pallii que si studiose servaveris per hoc quod pie ages honorandus intus habeberis Proinde frater age sollicite ut te bonus pastor gratia sue protectionis circumdet atque in timore suo in via te dirigat ut per huius vie amaritudinem ad eternam simul dulcedinem possis pervenire Decernimus ergo ut nulli omnino hominum liceat prefatam ecclesiam temere perturbare aut eius possessiones auferre vel ablatas retinere minuere seu quibuslibet vexationibus fatigare sed omnia integra conserventur eorum pro quorum sustentatione ac gubernatione concessa sunt usibus omnimodis profutura salva sedis apostolice auctoritate Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita nisi presumptionem suam digna satisfactione correxerit potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesu Christi aliena fiat atque in extremo examine districte ultioni subiaceat cunctis autem eidem loco sua iura servantibus sit pax domini nostri Iesu Christi quatinus et hic fructum bone actionis percipiant et apud districtum iudicem premia eterne pacis inveniant Amen amen amen Ego Alexander catholice ecclesie episcopus ss + Ego Hvbaldus Hostiensis episcopus ss + Ego Iohannes presbiter cardinalis sanctorum Iohannis et P[aul] titulo Pamachii ss + Ego Iohannes presbiter cardinalis tit sancte Anastasie ss + Ego Iohannes presbiter cardinalis tit sancti Marci ss + Ego Theodinus presbiter cardinalis sancti Vitalis tit Vestine ss + Ego Petrus presbiter cardinalis tit sancte Susanne ss + Ego Petrus presbiter cardinalis tit sancti Grisogoni ss + Ego Viuianus presbiter cardinalis tit sancti Stephani in Celio monte ss + Ego Cinthyus presbiter cardinalis tit sancte Cecilie ss + Ego Hug[o] presbiter cardinalis tit sancti Clementis ss + Ego Arduinus presbiter cardinalis tit sancte crucis Ierusalem ss + Ego Laborans diaconus cardinalis sancte Marie in porticu ss + Ego Rainerius diaconus cardinalis sancti Georgii ad velum aureum ss + Ego Gratianus diaconus cardinalis sanctorum Cosme et Damiani ss + Ego Iohannes diaconus sancti Angeli ss + Ego Math[eu]s sancte Marie nove diaconus cardinalis ss Dat Lateran per manum Alberti sancte Romane ecclesie presbiteri cardinalis et cancellarii II idus aprilis indictione XII incarnationis dominice anno MCLXXVIIII pontificatus vero domni Alexandri pape III anno XX