Charter Document - 04330054

Eugenius episcopus servus servorum dei venerabili fratri Ebhardo Salzburgensi archiepiscopo eiusque successoribus canonice substituendis in perpetuum Apostolice sedis clementia universis per orbem ecclesiis et ecclesiarum prelatis suam dignitatem consuevit et iustitiam conservare Quocirca dilecte in Christo frater Ebharde archiepiscope religionem ac devotionem tuam erga beatum Petrum et eius sacrosanctam Romanam ecclesiam attendentes iuxta ecclesie tue consuetudinem tibi per huius nostri apostolici privilegii palleum confirmamus cuius utique usum fraternitas tua infra ecclesiam tantum ad missarum sollempnia his videlicet diebus se noverit obtinere Natale domini Epyphania Cena domini Resurrectione Ascensione Pentecostes in tribus sollempnitatibus beate dei genitricis semperque virginis Marie in natalicio beatorum apostolorum Petri et Pauli in natale beati Iohannis baptiste in festo beati Iohannis evangeliste commemoratione omnium sanctorum in consecrationibus ecclesiarum et episcoporum benedictionibus abbatum ordinationibus presbiterorum in dedicacione ecclesie tue Preterea ecclesie tue suffraganeos videlicet Ratisponensem Patauiensem Frisingensem Brixinensem et Gurgensem tam tibi quam tuis successoribus nicholominus confirmamus salva in omnibus apostolice sedis auctoritate Studeat ergo fraternitas tua plenitudine tante dignitatis suscepta ita strenue cuncta peragere quatenus morum tuorum ornamenta eidem valeant convenire Sit vita tua subditis exemplum ut per eam cognoscant quod appetere debeant et quid cogantur vitare Esto discretione precipuus cogitatione mundus actione purus discretus in silentio utilis in verbo Cure tibi sit magis prodesse hominibus quam preesse Non in te potestatem ordinis sed equalitatem oportet pensare condicionis Stude ne vita tua doctrinam destruat nec rursum vite doctrina contradicat Memento quia ars est artium regimen animarum Super omnia studium tibi sit apostolice sedis decreta firmiter observare eique tamquam matri et domine tue humiliter obedire Ecce frater in Christo karissime inter multa alia hec sunt pallei ista sunt sacerdotii que omnia facile Christo adiuvante poteris adimplere si virtutum omnium magistram caritatem et humilitatem habueris et quod foris habere ostenderis intus habebis Sancta trinitas fraternitatem tuam glorie sue protectione circumdet et circa animarum custodiam vigilantem semper ac sollicitam reddat quatenus in eterna retributione valeas non solum de tuo opere sed de subditorum tuorum melioratione feliciter coronari Amen amen amen Ego Evgenius catholice ecclesie episcopus ss + Ego Ymarus Tusculanus episcopus ss + Ego Ugo Hostienis episcopus ss + Ego G[regorius] presbiter cardinalis titulo Calixti ss + Ego Iulius presbiter cardinalis titulo sancti Marcelli ss + Ego Octauianus presbiter cardinalis titulo sancte Cecilie ss + Ego Astaldus presbiter cardinalis titulo sancte Prisce ss + Ego Rollandus presbiter cardinalis titulo sancti Marci ss + Ego Iohannes presbiter cardinalis sanctorum Iohannis et Pauli ss + Ego Henricus presbiter cardinalis titulo sanctorum Nerei et Achillei ss + Ego Otto diaconus cardinalis sancti Georgii ad Velum aureum ss + Ego Rodulfus diaconus cardinalis sancte Lucie in Septa solis ss + Ego Gregorius diaconus cardinalis sancti Angeli ss + Ego Iacintus diaconus cardinalis sancte Marie in Cosmydyn ss + Ego Gerardus sancte Romane ecclesie diaconus cardinalis ss Dat Signie per manum Bosonis sancte Romane ecclesie scriptoris VII kal april indictione XV incarnationis dominice anno MCLII pontificatus vero domni Eugenii III pape anno VIII