Charter Document - 04330044

Innocentius episcopus servus servorum dei dilecto filio Geuene preposito ecclesie sancti Robberti Salzburgensis eiusque fratribus tam presentibus quam futuris imperpetuum Venerabilium locorum cura nos ammonet de eorum quiete atque utilitate sollicite cogitare Proinde dilecti in domino filii vestris rationabilibus peticionibus clementer annuimus et ecclesiam sancti Roberti in qua divino vacatis servicio sub beati Petri et nostra protectione suscipimus eamque presentis scripti pagina communimus statuentes ut quascumque possessiones quecumque bona idem locus inpresentiarum iuste et canonice possidet aut in futurum concessione pontificum liberalitate regum vel principum oblatione fidelium seu aliis iustis modis deo propitio poterit adipisci firma vobis in perpetuum et illibata permaneant Decernimus etiam ut ordo canonicus secundum beati Augustini regulam et institucionem venerabilis fratris nostri Conradi Salzsiburgensia archiepiscopi futuris perpetuis temporibus inviolabiliter inibi conservetur Sancimus etiam ut nullus de loco in quo statuti estis vos audeat amovere aut ordinem super vos alterius professionis inducere Obeunte vero te nunc ecclesie supradicte preposito vel tuorum quolibet successorum nullus ibi qualibet surreptionis astucia seu violentia preponatur nisi quem fratres ipsius loci communi assensu vel fratrum pars consilii sanioris secundum dei timorem et beati Augustini regulam sibi providerint eligendum Nulli etiam episcopo licentia pateat angarias vel alias novas exactiones canonice quieti et religioni contrarias vobis vel ecclesie vestre imponere Nulli ergo omnino hominum fas sit vos vel ecclesiam vestram super hac nostra constitutione temere perturbare aut eius possessiones auferre vel ablatas retinere minuere vel temerariis vexationibus fatigare sed omnia integra conserventur eorum pro quorum sustentatione et gubernatione concessa sunt usibus omnimodis profutura Si qua igitur in posterum ecclesiastica secularisve persona huius nostre constitucionis paginam sciens contra eam temere venire temptaverit secundo terciove commonita nisi reatum suum congrua satisfactione correxerit potestatis honorisque sui dignitate careat reamque se divino iuditio existere de perpetrata iniquitate cognoscat et a sacratissimo corpore et sanguine dei ac domini redemptoris nostri Iesu Christi aliena fiat atque in extremo examine districte subiaceat ultioni cunctis autem eidem loco sua iura servantibus sit pax domini nostri Iesu Christi quatenus hic fructum bone actionis percipiant et apud districtum iudicem premia eterne pacis inveniant Amen amen amen R Ego Innocentius katholice ecclesie episcopus ss + Ego Gerardus presbiter cardinalis titulo sancte crucis in Ierusalem ss + Ego Lucas presbiter cardinalis titulo sanctorum Iohannis et Pauli ss Dat Laterani per manum Aimerici sancte Romane ecclesie diaconi cardinalis et cancellarii non ianuarii indictione II incarnationis dominice anno MCXXXVIII pontificatus vero domni Innocencii II pape anno VIIII