Charter Document - 04330016

Johannes episcopus servus servorum dei reverentissimo ac amantissimo confratri nostro Friderico sancte Iuuauensis ecclesie archiepiscopo ac post te in eadem ecclesia in perpetuum Si sacerdotum ac reverendorum fratrum nostrorum votis et piis desideriis inpertimur assensum et deum nobis propicium faciemus et eos contra raptoris insidias ne grex dominicus incipiat lacerari solliciciores reddemus quia status et honor ecclesiarum dei quibus ipsi preesse videntur communis profectus est et communis gloria communis utique salus est Et ideo quia tua specialis devotio expostulavit a nobis quatenus eiusdem Iuuauensis ecclesie per tuam fraternitatem ius honorem et privilegium sibi antiquitus traditum non solum a nostris predecessoribus sed etiam a piissimis imperatoribus hactenus conservatum confirmare et in perpetuum roborare decrevissemus karitatis amore minime denegamus Inclinati igitur dignis tue fraternitatis peticionibus in eadem sancta tua ecclesia confirmamus stabilimus ac roboramus omnia privilegia seu precepta et instrumenta kartarum iura quoque sive paternas traditiones quas ab antecessoribus nostris pontificibus et a christianissimis imperatoribus Karolo dive memorie et omnibus successoribus eius necnon et a Baioariensibus regibus de episcopatibus monasteriis xenodochiis plebibus titulis curtibus mansis villis colonis et colonabus et utriusque sexus familiis et quicquid ipsa sancta ecclesia Iuuauensis promeruit vel iure promereri poterit summa etiam diligentia confirmamus et apostolica auctoritate roboramus tibi tuisque successoribus in perpetuum Deinde quoque loca nostra in Baioaria iacentia regione sic nominata Winiheringa Antesna Wolinbach concessimus predicto archiepiscopo sicut a predecessore nostro Agapito papa iam antea concessum est contra censum ut annuatim tres libras argenteas super altare sancti Petri conferantur Nam etsi in primo anno non venerit in secundo anno sex libre dentur et si accidente causa evenerit sive pro infestatione paganorum vel pro iniquis hominibus ut census a vobis minime venire possit in tercio anno totum impleatur et si census ille in tercio anno adimpletus non fuerit tunc prenominata loca redeant modis omnibus in potestatem et ditionem sancte nostre sedis apostolice si vero census per omnia adimpletus sit stabilis sit in perpetuum De illo ceco nomine Heroldo qui antea fuit episcopus et nunc missam cantat per suam audaciam quod ei licitum non est si deinceps in tali presumptione permanere presumpserit ut iterum missam cantet sciat auctoritate beati Petri apostolorum principis et nostra se anathematizatum et ab omnibus fidelibus Christi sequestratum Concedimus denique fraternitati vestre utendi pallium quatuor festivitatibus quibus in alio privilegio vobis minime concessimus nunc vero propter petitionem Ottonis serenissimi atque invictissimi imperatoris donamus licentiam videlicet in festivitate sancti Lavrentii in festivitate sancti Mavricii in festivitate sancti Rvdberti et in natalicii tui die Si vero quod absit postposita patrum regula neglectaque interdictione contra hoc nostrum pontificiale decretum magnus vel parvus homo peregerit rapinas atque depredationes exercere vel calumniam et preiudicium suprataxate ecclesie Iuuauensis de predictis locis superius nominatis et hanc nostram apostolicam sanctionem violare aut irrumpere temptaverit sciat se anathematis vinculo innodandum et a regno [dei] alienandum atque cum Iuda traditore eterni ignis incendiis nisi resipuerit exurendum Qui vero custos et observator huius nostri privilegii devote et obedienter extiterit benedictionis graciam a beato Petro principe apostolorum et misericordiam a deo patre et domino Iesu Christo consequi mereatur Scriptum per manum Stephani notarii et regionarii atque scriniarii sancte sedis apostolice in mense februario indictione quinta + Bene valete Data VII idus febr per manus Andree arcarii sancte sedis apostolice imperante domno Ottone piissimo augusto a deo coronato magno imperatore anno primo in mense primo indictione nostra quinta