Charter Document - 04320049
| Charter Number: | 04320049 |
|---|---|
| Cartulary Title: | St. Bernhard, Zisterzienserinnen 1263 - 1300 |
| Charter Language: | German |
| Charter Origin: | Lay |
| Charter Type(s): | Privilege |
| Date: | 1299 |
| Date type: | Internal, A.D., Feast |
| Resource Link(s): |
Monasterium.net |
Charter:
Ich Alber gehaizzen von Hohenstein tvn chvnt allen den di disen prief horent lesen oder sechent peidev di nv sint oder noch chvmftig sint daz ich mit gvetem willen meins selbes vnd miner hovsvrowen vron Elspeten vnd miner chinde Alber vnd Wilhalm miner svne Elspeten vnd Gerdravten miner toechter han verchavffet vron Offmein der Aptessinne von sand Bernhart vnd aller der samnvng di aigenschafte drittehalbes lehens vnd zwair hofstet dacz Waeczlinstorf di dinent vier phvnt vnd fvmfe vnd fvmfzig phenninge vmb ocht phvnt phenninge d er gemainen mvnzze vnd han avch di phenninge enphangen vnd hanz ledichlichen aufgegeben mit samt miner havsvrowen vnd minen chinden fver rechtez aigen als iz mich von minen vodern an ist chomen vnd gelobe ich vnd mein havsfrowe vnd meiner chint den vorgenanten vrowen scherm als in dem lande recht ist Vnd gib in disen brief versigelten mit minem insigel Diser dinge sint gezivge her Stephan von Meyssawe der Marschalch in Osterriche ist vnd her vlrich sein svn her Adlolt vnd sein svne her Heinriche vnd her chvnrat von Cheyawe her havch vnd her Otte vnd her Reimprecht von Lichtenvels di alle dinstherren sint her Wolfhart von Dvrrenpach her Heinrich von Pernhartstorf di reitter sint her Hainrich der Wilpaergaer vnd her Levtwin sein aidem her Almar von speissendorf vnd ander frvm levt genvch Disev dinch sint geschehen da von Christes gebvrte waren tavsent iar vnd zwai hvndert iar vnd Nevnzig vnd Nevn iar an sand veites tach datze Hollenstain in dem havse