Charter Document - 04320038
| Charter Number: | 04320038 |
|---|---|
| Cartulary Title: | St. Bernhard, Zisterzienserinnen 1263 - 1300 |
| Charter Language: | Latin |
| Charter Origin: | Religious |
| Charter Type(s): | Privilege |
| Date: | 1296 |
| Date type: | Internal, A.D., Feast |
| Resource Link(s): |
Monasterium.net |
Charter:
Ad removendam negligenciam et errorem sollerti studio intendimus procurare ut res geste que sepius per oblivionem a memoria decidunt humana scriptis et testibus ad posteros fideliter devolvantur Hinc est quod frater Ebro dictus Abbas de Zwetel notum facimus tam presentibus quam futuris quod una cum et consensu tocius conventus eiusdem loci nec non Reverendi visitatoris nostri domini Perchtoldi Abbatis de sancta cruce curiam nostram sitam iuxta Horn dictam Winpwaphing servientem tria talenta denariorum annuatim et unam aream sub annuo servicio unius talenti ibidem vendidimus sacrosancto collegio dominarum ad sanctam Bernhardum in Chrueg pleno iure sicut eandem possedimus pro quadraginta duobus talentis denariorum publice monete viennensis eodemque eciam denarios in empcione prediorum que aput dominum Hugonem de Liechtenvels conparavimus maturo consilio seniorum nostre domus inpendimus nobis ut speramus in posterum profuturos Insuper dictis dominabus in ipsa empcione promittimus debitam defensionem Vt autem hec deinceps inviolata permaneant et inconcussa et ne quis supra dictis dominabus inferre de notata empcione calumpniam audeat vel presumat hanc paginam sigilli domini nostri antedicti abbatis sancte crucis ac nostri sigilli munimine cum testibus subscriptis tradidimus roboratam Quorum testium hec sunt nomina Frater Chunradus prior in Zwetel Frater Otto subprior Frater Rapoto hospitalarius Frater Leopoldus magister conversorum Frater Cristanus tunc celerarius et alii quam plures cum fratre Ottone sepe dictarum dominarum procuratore testimonio ac fide digni Acta sunt hec anno domini MCCLXXXXVI in die sancti Marci evangeliste