Charter Document - 04320026

Ich Wulfinch von Sunberch tuen chund dew disen brief ansehen oder horen lesen und ich Hedweich von Sunberch herrn otten tochter von Slewncz tuen ouch allen den chund di disen brief ansehen oder horen lesen Daz ich Hedweich und mein wiert her Wulfinch von Sunwerch paidew haben gegeben mit verdachtem muet und mit guetem willen und an allen twanchsal hern Stephan von meyssow dem marschalich in osterreich und seinen eriben di aygenschaft die wier gehabt haben an der chirichen dacz Slewncz die hab wier im ledichleich gegeben also daz er da mit getuen mag allez daz er waiz daz seiner sel hail sei wand wier im also gegeben haben als iz uns anerstariben izt von unserm vater hern Otten von Slewncz daz wier ez wolgetuen megen und loben ouch daz an disem brief daz wier dez selben vor genanten aygens sein scherm sein alz landes und aygens recht izt Nu hat ouch der selb vorgenant Stephan von meyssow uns gegeben wider daz selb aygen daz wir im gegeben haben an der chirichen dacz Slewncz dez leipgedinges dez wier im gegeben heten zu unserr tochter di wier heten pei hern Dietreichenvon Gnenicz dez hat er uns ledig lazzen so vil daz uns dez genuegt und daz wier nicht daran zeichen nuer lieb und guet daz disew red stet beleib und unzebrochen dez geb wier disen brief versigelten mit unserm insigel und mit den gezeugen di her nach geschriben sind her Hadmar von Sunwerch der alt sein sun herr Hadmar von Sunwerch herr Alolt von Cheyow herr Chunrat von Puechperch herr Hainreich von Plenkch Rapot von grozz Erchenger von grozz Meinhart von Stalekke Hainreich von Duernpach Popp von Liebenwerch Ortolf von Ronnwerch Daz izt geschehen dacz Drosendorf da von Christes gebuerd ist gewesen Tawsent iar zwaihundert iar und aines und Newnczig iar