Charter Document - 04320014

Wier Nicolaus obrister pischolf und ein chnecht gotes diener enpieten in got unsern lieben tochtern der Aptessin und der samnung sand Bernharts chloster ze Chrueg grabes ordens in dem pistuem ze passow unsern gruez und pebstleichen segen Dez hat gwonhait von oftversuechter guet der heilig stuel ze rom daz er die andechtigen und diemuetigen chinder volchomchleich lieb hat und daz icht von poser lewt anvechtung oder laidigunge betruebt werden so nimt er sew alz ein guetigew mueter in die freyung seines schermes Und darumb in got ier lieben toechter engegen wir mit gnemmer gunst ewr rechten begier und nemen ewr person und die stat da ier hin geben seit zu gotleichenn dienst mit allem ewrn guet daz ier ze gegenburt redleich habt oder daz ier fuerbaz mit gotes hilfen rechtichleich gewinnet under den scherm des heiligen sand peters und under den unsern und besteten ew von pebstleichem gwalt und mit einer vestigung dicz briefes besunderleichen waz ier ze veldt habt houser gerten guelt weingarten wisen holcz hof waid wismad und ander ewr gueter di ier recht und mit fritsamer gwer habt und da von well wier daz chain mensch zepreche disen brief unsers schermes und bestetigunge und freveleich da wider tue wer aber daz getuen der wizz daz er vellet in die ungenad dez almechtigen gotes und der heiligen sand Peter und sand Paul