Charter Document - 04310002
| Charter Number: | 04310002 |
|---|---|
| Cartulary Title: | Waldhausen, Augustiner-Chorherren (1147 - 1826 [1350]) |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 1147 |
| Date type: | Internal, A.D., Calendar, Regnal |
| Resource Link(s): |
Monasterium.net |
Charter:
In nomine sancte et indiuidue trinitatis Cunradus diuina fauente clemencia Romanorum rex secundus Si antecessorum nostrorum regum seu imperatorum pie deuocionis limitem prosequentes ad cultum diuine religionis dilatandum Christi fidelibus in posterum prouidere et de statu et profectu illorum pro debito regie auctoritatis oportune ordinare studebimus idem nobis tam ad presentis uite tranquillitatem quam ad futuram beatitudinem promerendam profuturum non ambigimus Ea propter omnium tam futurorum quam presentium nouerit industria quod dominus Otto de machlant tam antecessoribus suis quam sibi omnique posteritati sue in remissionem peccatorum suorum hoc remedium contulit quod de possessionibus suis in honore sancti Johannis ewangeliste et sancti Stephani prothomartiris nouellam plantationem ad preposituram Kanonicorum regularium ordinandam diuina inspirante clementia inchoauit Ad quam excolendam a heinrico comite ratisponensi partem nemoris quod beinwalt dicitur duce heinrico marchione Cunrado annuentibus eiusdemque particule nemoris usum remittentibus comparavit Huius inquam comparate possessionis uniuersi usus nemoris aque uici terre molendinorum uidelicet in ascensu fluuii sabenegge de hoc loco ubi intrat danubium usque ad uicum qui ducit ad sanctum Georium et ad hyspere fluuium et in huius descensu usque ad pontem uicinum de hoc ponte in summitates montium qui uocantur thasperch et clogges abhinc in torrentem Waidenbach et in huius descensu secundum factam designationem usque ad danubium terminos denotauit Adhuc predictus Otto super his omnibus melius sibi prouidit et ne hoc comercium et tante religionis inceptum quia predictum nemus ad regie excellentie nostre usum pertinet nobis rennuentibus et contradicentibus frustraretur regiam munificentiam adiit et singula prout fecit et facturus erat ordine nobis exposuit Nos uero pro peticione ducis et marchionis maxime autem causa promouende religionis predicti nemoris usum quod ipse comparavit libertati constituende ecclesie remisimus et presentis privilegii auctoritate confirmauimus ne aliquis successorum nostrorum vel ducis vel marchionis vel comitis ratisponensis hunc usum sibi uendicare presumat Huius rei testes sunt heinricus ratisponensis episcopus Regebertus battauiensis episcopus Poppo comes et frater eius bertoldus comes ludewicus de othingen Eberhardus de teile Signum domni Cunradi romanorum regis secundi Ego Arnoldus cancellarius uice heinrici moguntini archiepiscopi et archicancellarii recognoui Data secundo Nonas Junii anno dominice incarnationis MCXLVII Regnante Cunrado romanorum rege secundo Anno vero regni eius X