Charter Document - 04271034

In dem namen der heiligen und der ungetailten drivaltikait amen Wir Fridreich von gotes genaden herzog ze Osterreich und ze Steir pieten allen gotes getreun das hail imer und ewikleich Seit das wir geruer t albeg wellen werden wider ein igleicheu kirichen mit einer gutigen pegernuzs doch wesunder gegen der chirichen des allerseligisten martrer gotes sand Poelten den wir uens haben ausderwellt zu einem gue tigen redner bei dem strengen richter daz wir den albeg fuederen wellen mit der gebung unsers almuesen under unser verschiernuezs Darumb tue wir offenbar allen den deu do gegenburtig oder kunftig sind daz wir geben haben der vorgenanten kirichen des martrer sand Polten und den korherren di doselbs dienund sind einen hoff zu Egelsee gelegen bei Chrembs mit aller zuegehorung mit einem ewikleichen rechten zu wesitzen durich unserr sellhails willen und auch durich aller freunde also das chainer unser brueder gegenburtig oder hernach kunftig den selbigen hoff ze gewalt haben immermer zu verkaufen oder in etlicher mass enphfromden von der vorgenanten kirichen ze Sand Polten Und das unser gab vest sei und unzebrochen so hab wir zu merer gewishait lassen bestetigen disen brief gegenburtigen mit der bewarung unsers insigel und mit den nachgeschriben zeugen der ersam herr her Rueger pischolf ze Passau her Chuenrat pischolf ze Freising und ander ersam mann her Ulreich archidiaken und korherr zu Passau her Gerhart und her Eberhart karherren daselbs her Ulreich pharrer zu Chirichperg und ander diener Diettmar von Liechtenstain Hartman von Wesen Herman Dolser Hainreich von Merswankch Chuenrat und Hainreich von Czelking Di dorgenanten ding sind geschechen in der kirichen dacz Sand Polten nach Christi gebuerd tausend jar zwai hundert jar ains und vierzig jar an dem anderen tag kalendas augusti das ist an dem ainunddreissigisten tag des maneit Julii []