Charter Document - 04270159

Ich Sweyker der Schauhinger und mein erben vergehen offenlich mit dem brief umb ain wis gelegen datz Schauhing di mein swager Goerg der Puchlaer selig verchauft hat dem erwierdigen herren hern Ulreichen probst datz sand Poelten und seinem convent daselbs umb zwai und dreizzich phund wienner phenning der si in selben bei seinen lebtegen achtzehen phund verricht habent als mier und andern erbern leuten das wol chund und wizzenlich ist daz ich die uebrigen vierzehen phund phenning der si dem egenanten Gorgen meinem swager schuldig worden von sunder potschaft wegen die mier mein swester Giwierch desselben Goergen des Puchlaer seligen witib darumb getan hat ingenoemen und emphangen han und sag den vorgnanten hern Uelreichen probst ze sand Poelten und sein convent an meiner meiner swester und aller anderr erben stat des vorgnanten gelts ledig und los Gewunnen aber seu an der vorgnanten wis fuorwas icht chrieg und ansprach von wem das wer so sullen wier fuer seu sten und in das genzlich ausrichten Mit urchund des briefs versiglt mit mein vorgnanten Sweikkern des Schawhinger insigl und mit Ulreichs des Chlingen insigel der der sach zeug ist mit seinem insigl Geben an sand Cholmans tag nach Christes gepuerd dreuzehen hundert jar darnach in dein aecht und sechzgistem jare