Charter Document - 04270147

Wir Chunrat von gotes gnaden erzbischolf ze Salzburch und legat des stuols ze Rome verjehen und tuon chunt allen den di disen brief sehent oder hoernt lesen daz wir daz guot dar umbe der probst von Hertzogenburch ansprach gen uns het ez si an der wise di Proebstinne diea Wolfram inne hat mit dem guot daz dar zuo gehoert oder an der wise di da haizzet Swellerinne mit dem daz dar zuo gehoert oder and der wise di da haizzet Chamerwise und daz dar zuo gehoert oder an anderm guot Ulrichen unserm probst ze Mower verlihen haben umb zwai und fuemzich phunt wienner phenninge also daz daz selbe guot unser urborleut mit im suln haben Wolden aber si ez niht mit im haben so belibet ez dem vorgenantem Ulrichen und siner housfrowen Ofmeien und sinen erben ouf den alten dienst den man e da von hat gedient Moeht aber der vorgenant Ulrich aine des guotes niht gewern so erlouben wir im daz er daz vorgenant aigen ze ainzigen gelazzen mueg unsern urborleuten mit den alten rehten und dienst Doch behalt wir uns besunderlich den weingarten an Stalhoverperige und di hofstat di Hainrich Per hat Und sint des geziuge unser lieb bruoder in got her Engelbreht der abt von Sand Peter ze Salzburch Seifrid unser Schreiber Rudolf von Vonsdorf unser vitztum ze Friesach Ulrich Marchartes suen Hainrich sin aidem Prehtel under der louben Ott der probst von Arnsdorf Alram der Stiller und ander geziuge Der brief ist gegeben ze Wienen do von Christes geburt warn tousent jare zwaihundert jar und in dem dritten und niunzigstem jar an sand Thomas tag dere zwelifboten