Charter Document - 04270120
| Charter Number: | 04270120 |
|---|---|
| Cartulary Title: | St. Pölten, Augustiner Chorherren (976 - 1668 [1350]) |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1284 |
| Date type: | Internal, A.D., Feast |
| Resource Link(s): |
Monasterium.net |
Charter:
G dei gratia prepositus W decanus totumque capitulum Pataviensis ecclesie omnibus in perpetuum Pure rationis acumine speculantes illam celebrem et famosam Ypolitensem ecclesiam religionis pollere sacris observantiis hospitalitatis vigere decentibus exercitiis honestatisque laudabilibus reflorere titulis et varietate virtutum ipsam multipliciter adornatam velutque stellam matutinam in medio nebule huius mundi resplendentem emittere bone operationis radios luminosos accendimur e in interiori homine per spiritum et allicimur eam condignis prevenire honoribus et pro posse beneficiorum dotare stipendiis ex eo potissime quod a sancte matris nostre Pataviensis ecclesie visceribus extracta fore dinoscitur Et ob id nos ei specialiter reputantes obnoxios ad ipsius honoris ampliandas fimbrias cogimur in eius profectibus tanquam Syon filie inclite auro primo amitte iocundius delectari et delectabiliter iocundari cum non solum lucis exemplo fulgeat quin inmo ardoris incentivum in alios religione transmittat e ut videlicet ipsa Ypolitensis ecclesia nec inmerito dici possit lucerna lucens et ardens non in abscondito neque sub modio sed super candelabrum posita ut qui ingrediuntur semitas iusticie in ea tanquam in speculo lumen videant clarius agnite veritatis Ea siquidem pia consideratione reverendus in Christo pater et dominus Gotfridus Pataviensis venerabilis episcopus ecclesiam in Pruk preposito et fratribus eiusdem Ypolitensis ecclesie donavit tradidit et indulsit in usus eorum necessarios retinendam quibusdam conditionibus appositis ut donationis instrumentum predicti domini nostri episcopi lucidius protestatur Quam igitur donationem ratam et gratam habemus ipsamque voto unanimi consensu pari voluntatis bone studiis approbamus in hoc tamen pietatis officio cum gratiarum actionibus ipsum conventum et canonicos Sancti Ypoliti oneratos esse volentes ut postquam alicuius nostrum obitus eis fuerit nunciatus diem depositionis teneantur peragere in vigiliarum decantationibus et missarum sollempniis e prout uni de suis confratribus actenus facere consueverunt quod et ipsis ad meritum constat liquido provenire cum revera pro alio orans se ipsum liberet et nullum bonum irremuneratum remaneat sed et verus ipse Samaritanus cum redierit in examine finalis iudicii et meritorum discussione subtili fideliter supererogata reddere sit paratus Ut hec autem ex continuis temporum curriculis aquis oblivionum absorbeantur minime aut a quoquam calumpniose in posterum valeant inpugnari presens instrumentum ad perpetuam rei memoriam conscribi fecimus et conscriptum sigillo nostri capituli consignari Datum Patavie anno domini MCCLXXXIIII indictione XIIII in die sancti Syxti presentibus et collaudantibus dominis Gr preposito W decano S de Tannberch Ul de Styria magistro Hertwico M de Morspach M de Waldek Gr de Polnhaim magistro Engelschalko Wer de Sirinch P de Capella W de Lobenstein H de Weiten H vicedomino Ch de Heindendorf H custode