Charter Document - 04270082

Venerabili in Christo patri et sibi karissimo [] dei gratia electo Salzburgensi frater Gwido miseratione divina tituli sancti Laurentii in Lucina presbiter cardinalis apostolice sedis legatus salutem et sinceram in domino karitatem Sumpta de benignitate vestra fiducia nos inducit ut preces nostras vobis secure porrigamus sperantes ipsas apud vos locum exaudicionis et gratiam invenire Hinc est quod cum nos dilecto capellano nostro [] preposito Sancti Ypoliti eiusdemque ecclesie conventui ordinis sancti Augustini Pataviensis diocesis propter eorundem inopiam relevandam cum ipsorum ecclesia sit ignis incendio devastata nec ipsi possint de propriis redditibus vivere ut deceret nec hospitalitatis onera supportare ut ecclesiam de Prukka et omnes redditus et proventus ipsius ecclesie in qua ius patronatus ad ipsos dinoscitur pertinere cum eam vacare contigerit licite retinere et libere perpetuo possidere possint ad id dumtaxat diocesani accedente consensu auctoritate qua fungimur duxerimus concedendum paternitatem vestram affectuose requirimus et rogamus quatenus nostrorum obtentu precaminum venerabilem patrem [] dei gratia Pataviensem episcopum et discretos viros prepositum decanum et capitulum eiusdem ecclesie affectuose rogare et diligenter monere dignemini ut quod per nos in hac parte factum est ratum et gratum habentes eisdem [] preposito et conventui ad hoc sine difficultate qualibet benignum prebere velint assensum tantum inde facientes quod iidem [] prepositus et conventus preces nostras apud vos sibi sentiant profuturas et nos proinde suo loco et tempore vobis teneamur ad gratiarum uberes actiones Datum Wienne V kalendas iunii pontificatus domini Clementis pape IIII anno tercio