Charter Document - 04230250

Bela Dei gratia rex Hungarie [] Regie convenit celsitudini ut si aliqua a suis recipit fidelibus que sibi utilia fore conspicit eisdem postmodum in consimili providere debeat vel maiori Proinde ad universorum notitiam volumus pervenire quod cum castrum Koscen quod nunc Wywar nuncupatur cum pertinentiis suis donatum monasterii Sancti Martini de Sacro Monte Pannonie per predecessores nostros prout in privilegio eiusdem monasterii continetur paulo post karissimus pater noster illustris rex Andreas clare memorie ab ipso monasterio recepisset et nos postmodum tenuissemus commutationem dicto monasterio nullam dando pro eodem quod facere non decebat licet abbas et conventus dicti monasterii multoties nos rogassent ut aut idem castrum reddere aut pro eodem castro in concambio sibi dignaremur providere tamen neutrum illorum facere potuimus diversis negotiis regni nostri prepediti maxime cum idem castrum quod usui nostro reservamus etiam pro conservatione regni nostri confiniorum nimis utile habeatur attendentes itaque et in corde multociens revolventes quod ipsum monasterium fundatum per Sanctum regem Stephanum dominum predecessorem ac patronum regni nostri speciali dilectioni nobis convenit amplexari et proventus seu possessiones eiusdem magis augmentari quam diminui vestigia sanctorum predecessorum nostrorum imitando ac etiam illud quod cum ad partes maritimas tempore persecutionis gentis Tartarice ire nos oportuit de pecunia eiusdem monasterii octingentas marcas finiti argenti recepissemus ad usus nobilium regni nostri qui tunc fame periclitabantur expendentes quas postmodum eidem monasterio refundere nequivimus diversis causis incumbentibus ad memoriam revocantes et reputantes seu tenentes premissa que ab eodem monasterio recepimus cedere in magnum detrimentum anime nostre nisi in melius per nos reformata seu restaurata extitissent presertim cum regibus non expediat auferre ab ecclesiis sed potius elargiri eidem monasterio Sancti Martini in concambium predicti castri Kuyscen sive Vywar et pro satisfactione pecunie recepte per nos ab eodem possessionem nostram de Vyhel que alio nomine Regia Villa nuncupatur cum portu super fluvio Wag constituto et tributo fori eiusdem ville ac cum omnibus utilitatibus et pertinentiis suis item villam Lubo similiter cum portu in fluvio Wag constituto item villam Seredahel et villam Potworich spectantes seu pertinentes ad ipsam villam Vyhel existentes in comitatu Nitriensi similiter cum omnibus utilitatibus et pertinentiis suis quamlibet earum sub eisdem certis metis et terminis quibus tempore collationis nostre possesse fuerant perpetuo duximus conferendas sub ea libertate quam tempore collationis nostre habebant populi earundem villarum videlicet quod nec in furto nec super decimis nec super facto monete vel aliis quibuslibet causis coram comite parochiali astare teneantur nisi coram villicis suis et in causis maioribus coram nobis nec etiam coram aliis iudicibus regni nostri astare debeant iuxta libertatem aliorum populorum eiusdem monasterii prout in privilegiis sanctorum progenitorum nostrorum et maxime in privilegio Sancti regis Stephani eidem ab antiquo concesso dignoscitur plenius contineri Nec hoc pretermittimus quod venerabilem virum Fawm abbatem et conventum monasterii Sancti Martini supradicti in possessionem corporalem omnium premissorum per dilectum et fidelem nostrum magistrum Mutmerium prepositum de Sepus cancellarium domine regine karissime consortis nostre nomine ecclesie fecimus introduci decernentes ut si quis heredum nostrorum contra huiusmodi donationem nostram pia ac salubri consideratione dicto monasterio factam aliquid attemptaverit Sanctum Martinum et Sanctum regem Stephanum sibi sentiat adversari Ut igitur huius nostre donationis series robur perpetue firmitatis optineat presentes dedimus litteras duplicis sigilli nostri munimine communitas Datum per manus dilecti et fidelis nostri magistri Farcasii electi Albensis aule nostre vicecancellarii anno Domini MCCLXIII regni autem nostri anno vicesimo octavo