Charter Document - 04230218
| Charter Number: | 04230218 |
|---|---|
| Cartulary Title: | Pannonhalma, Bences - Capsarium (1000 - 1526 [1350]) |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1258 |
| Date type: | Internal, A.D. |
| Resource Link(s): |
Monasterium.net |
Charter:
Capitulum ecclesie Leuriensis universis Christi fidelibus presentium inspectoribus salutem in salutis largitore Universitati vestre declaramus presentium per tenorem quod venerabilis pater Favus abbas monastarii Sancti Martini de Sacro Monte Pannonie litteras regias nobis presentavit in quibus nobis dabatur in mandatis ut aliquem ex sociis nostris una cum predicto abbate ac Iohanne comite filio Gug comitis pristaldo ipsius domini regis necnon Elec filio Nycholai ad circumeundam quandam terram predicte Elec nomine Dyonys sitam in comitatu Posoniensi transmitteremus Nos itaque mandato domini nostri regis satisfacere cupientes ut tenemur magistrum Alexandrum concanonicum nostrum virum discretum cum domino abbate Iohanne comite et Elec predictis transmissimus in cuius presentia cum abbas comes Iohannes et Elec predicti convocatis commetaneis et vicinis terram predictam peragrassent et idem Elec suam eis aperuisset voluntatem quod ipsam terram abbati et monasterio Sancti Martini conferre ob sue anime remedium intendebat unanimiter responderunt quod prefatum dominum abbatem et monasterium Sancti Martini liberaliter et libenter sine contradictione aliqua in suum vicinum et commetaneum admittebant Postmodum vero sepe dictus Elec in nostri presentia constitutus confessus est quod predictam terram suam Dyonys pro remedio anime sue necnon pro trecentis quatuor marcis quas confessus est eundem abbatem suo ac monasterii sui nomine sibi iam dudum persolvisse ad plenum contulerat ipso domino abbati ac monasterio Sancti Martini cum duobus servis Beed et Iteu ac uno libertino nomine Andrea pacifice et quiete de cetero possidendam ac proprietatem et dominium eiusdem in prefatum monasterium Sancti Martini transtulit pleno iure nullum in ea ius sibi vel suis heredibus reservando Ipsa vero terra est undique consignata metis veteribus et antiquis que perveniendo ad magnum Danubium a terra villarum Chun et Uruzwar per eundem Danubium separantur Ut igitur huius rei series robur optineat firmitatis perpetue ad petitionem eiusdem Elec abbati et monasterio Sancti Martini sepe dictis presentes concessimus litteras nostri sigilli munimine roboratas Anno Domini MCC quinquagesimo octavo Chepano ecclesie nostre preposito Iurkone cantore Thoma custode existentibus