Charter Document - 04230180

Innocentius episcopus servus servorum Dei carissimo [in] Christo filio B[ele] illustri regi Ungarie salutem et apostolicam benedictionem Significantibus dilectis filiis [] abbate ac conventu monasterii Sancti Martini de Pannonia ordinis Sancti Benedicti nos noveris accepisse quod quondam Walferus comes quadam ecclesia in monte Quinzin munitioni apto sed in loco inhabitabili et deserto constructa locum ipsum cum predicta ecclesia de assensu inclite recordationis [] regis Ungarie proavi tui [] episcopi diocesani et nobilium Ungarie monasterio predicto concessit in qua ecclesia iuxta ipsius comitis desiderium conventus extitit institutus et tres in ea fuerunt per tempora in abbates promoti Postmodum vero clare memorie [] rex Ungarie avus tuus prefatam ecclesiam amotis inde personis ibidem Domino famulantibus pro munitione recepit promittens quod locum alium aptiorem ad ecclesiam construendam et plura etiam in possessionibus et bonis aliis quam eadem habebat ecclesia in recompensationem ipsius donaret monasterio supradicto Quod nec idem morte preventus nec clare memorie [] rex Ungarie pater tuus postea executioni mandarunt Cum igitur rex regum et dominus dominantium ad hoc ad regni te solium misericorditer sublimarit ut ecclesias et loca religiosa regni tui foveas ac regie munificentie beneficiis debeas augmentare serenitatem tuam rogamus monemus attentius et hortamur quatinus monasterium antedictum ob reverentiam apostolice sedis et nostram habens propensius commendatum recompensationem congruam pro premissis iuxta promissionem predicti avi tui eisdem abbati et conventui precum nostrarum optentu exhibeas liberaliter et benigne quod rogamus taliter impleturum quod a Deo qui nullum bonum irremuneratum relinquit eterne retributionis premium consequi merearis et nos celsitudinem regiam dignis in Domino laudibus commendari possimus Datum Lugduni XV Kalendas Ianuarii pontificatus nostri anno secundo