Charter Document - 04230178

Nos U[rias] Dei gratia abbas humile ac devotum universum capitulum monasterii Sancti Martini de Sacro Monte Pannonie universis Christi fidelibus salutem in Eo qui est salus et rector omnium Universitati vestre tenore presentium duximus declarandum quod cum nostras terras et iura earundem in Sala supra Wag existentium indebite et inordinate vidissemus occupari et pretium condignum iuris ordine nobis et ecclesie nostre non persolvere a nostris populis ibidem degentibus nos vero quorundam virorum adiuti consilio dictarum terrarum comodum in alium commutavimus statum Qui dicti populi inter se animadvertentes et pacis colloquio ad memoriam redeuntes temporis intervallo prout decet filios ad matrum verbo recurrentes precibus communiter nostris auribus intonuerunt ut cum eis secundum tempus pristinum misericorditer ageremus Qui nos eorum precibus et petitionibus annuentes misericordia moti ut non dispergerentur imo potius multiplicarentur cum eisdem talem fecimus conventionem ut de singulis iugeribus nobis singula pondera persolverent cum iugerum mensura qua mensurantur iugera terrarum domini regis in eadem patria existentium Tempora autem solutionum sunt hec primo a Nativitate Beate Marie usque festum Sancti Michaelis secundo a festo Sancti Andree ad Nativitatem Domini ex integro persolvantur De solutione autem decimarum pariter nobiscum disposuerunt quod sicuti decime domino archiepiscopo persolvuntur eodem modo ipsi nobis deinceps persolverent Ista tamen conventio sic est ordinata et firmata ut ipsi aliquid aliud nobis amplius preter ista solvere non tenerentur verbi gratia neque officia nostri desscensus sed ut plenius in posterum memorie commendemus nichil penitus tenentur solvere nisi quod ex eorum benivolentia ministraverint Et ut hoc scriptum per temporis cursum robur obtineat sigilli nostri munimine adque capituli iussimus roborari Datum anno gratie MCCXLI presentibus T[homa] priore custode Sebastiano clavigero Blasio et notario fratre Kiliano