Charter Document - 04230174

Gregorius episcopus servus servorum Dei dilectis filiis [] de Bochon Cisterciensis ordinis et [] de Tichon abbatibus et [] priori de Bochon Vesprimiensis diocesis salutem et apostolicam benedictionem Exposuerunt nobis dilecti filii [] abbas et conventus Sancti Martini de Pannonia ordinis Sancti Benedicti quod cum inter ipsos ex parte una et sacerdotes comitatus Simigiensis Vesprimiensis diocesis ex altera coram venerabili fratre nostro [] Prenestino episcopo tunc in partibus illis apostolice sedis legato super quibusdam decimis questio verteretur mediante tandem ipso episcopo amicabilis inter eos compositio intervenit ad quam observandam dicti sacerdotes se iuramenti vinculo astrincxerunt sed iidem contra iuramentum prestitum temere venientes compositionem ipsam observare recusant Quocirca discretioni vestre per apostolica scripta mandamus quatinus si est ita dictos sacerdotes ut compositionem eandem sicut sine pravitate provide facta est et ab utraque parte sponte recepta ac in ipsius episcopi litteris dicitur plenius contineri sicut tenentur observent monitione premissa per censuram ecclesiasticam appellatione remota cogatis Quod si non omnes hiis exequendis potueritis interesse duo vestrum ea nichilominus exequantur Datum Laterani XII Kalendas Martii pontificatus nostri anno tertiodecimo