Charter Document - 04230162

Gregorius episcopus servus servorum Dei carissimo in Christo filio [] illustri regi Ungarie salutem et apostolicam benedictionem Etsi tamquam princeps catholicus et devotus debeas omnes generaliter regni tui ecclesias in sua iustitia confovere monasterio tamen Sancti Martini de Pannonia eo amplius in suo iure teneris quo certius est ut dicitur regalis sublimitas quod de illo spiritualis sibi utilitas provenit et etiam temporalis Sane oblata nobis dilectorum filiorum [] abbatis et conventus eiusdem monasterii petitio continebat quod quondam Gualfer comes constructa quadam ecclesia in monte Quinzin munitioni apto sed loco inhabitabili et deserto de assensu tandem inclite recordationis [] regis Ungarie avi tui episcopi diocesani et aliorum nobilium regni ecclesiam ipsam monasterio predicto concessit in qua iuxta ipsius comitis desiderium [] abbas monasterii memorati conventum instituit et tres ei per tempora prefecit abbates Postmodum vero clare memorie [] rex pater tuus suggestione quorundam prefatam ecclesiam remotis inde personis cum eodem monte sibi [pro munitione recepit promittens quod locum] alium ad ecclesiam aptiorem et plura etiam in possessionibus et aliis quam eadem haberet ecclesia donaret eisdem quod nec ipse imple[vit morte pre]ventus nec per te id hactenus factum fuit Nunc autem Demetrius comes montem eundem cum predicta ecclesia et possessionibus ad eam pertinentibus ex regia ut dicit donatione detinet et reddere contradicit Unde humiliter supplicarunt ut cum te omnino non deceat quod cum ecclesiarum iactura sis aliis liberalis quin potius honori tuo conveniat eas de propriis facultatibus augmentare adesse sibi super hoc misericorditer dignaremur Preterea referentibus eisdem abbate et conventu didicimus quod dictus D[emetrius] comes quandam eorum insulam in Danubio Obda videlicet per privilegia eis regia confirmatam cum decem servorum et quatuor piscatorum mansionibus detinet violenter Comes quoque de Budrug tributum quod eis de foro et portu Budruo competit temere occupavit ac restituere contradicit Et cum bone memorie S[maragdus] archidiaconus de Papa capellam quandam iuxta palatium suum ab ipso constructam cum possessionibus et aliis ad eam pertinentibus de tuo et episcopi diocesani assensu dum adhuc viveret ipsis concesserit eo tandem mortuo et per eosdem quodam in eo sacerdote monacho instituto Fabianus miles de mandato regio ut asserit capellam eandem eiecto inde predicto monacho cum universis ad eam pertinentibus occupare presumpsit Super quibus omnibus iidem apostolicum remedium implorarunt Quocirca serenitatem regiam monemus et hortamur in Domino quatinus te in hoc gerens ut devotum principem et ecclesiasticorum iurium zelatorem predicta restitui facias monasterio memorato ita quod talem et tantum protectorem habere letetur et tue sinceritatis devotio apud Deum possit et homines exinde commendari et cum predicti abbas et conventus super premissis causam per litteras apostolicas habeant cum nobilibus memoratis nequaquam super hiis te illis opponas sed potius in iure suo assistas eisdem interponendo insuper pro Dei reverentia tam super hiis quam super causa que inter predictum monasterium et ecclesiam Albensem vertitur partes tuas ut et si non iudicio compositione saltem amicabili questiones huiusmodi sopiantur et cum ad componendum inter ipsum monasterium et prefatam Albensem ecclesiam ceperis intendere per teipsum nos ad id cum sit pium et laudabile regalem celsitudinem excitamus Sic itaque preces et exhortationes nostras admittas quod a Deo inde consequi valeas meritum et apostolicum favorem et nostrum in tuis oportunitatibus plenius obtinere Datum Anagnie V Kalendas Septembris pontificatus nostri anno undecimo