Charter Document - 04230134
| Charter Number: | 04230134 |
|---|---|
| Cartulary Title: | Pannonhalma, Bences - Capsarium (1000 - 1526 [1350]) |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1235 |
| Date type: | Internal, Calendar, Episcopal |
| Resource Link(s): |
Monasterium.net |
Charter:
Reverendo in Christo patri ac domino B[artholomeo] Dei gratia Vesprimiensi episcopo nos Simigiensis et Ticoniensis abbates et decanus Ticoniensis executores a summo pontifice orationes in Domino Noverit vestra paternitas nos litteras domini pape recepisse sub hac forma Gregorius episcopus servus servorum Dei dilectis filiis [] Simigiensi et [] Ticoniensi abbatibus et [] decano Ticoniensi Vesprimiensis diocesis salutem et apostolicam benedictionem Dilecti filii [] abbas et conventus monasterii Sancti Martini de Pannonia nobis significare curarunt quod cum olim ipsi Demetrium Budou Urulou Benedictum ac alios homines de villa Vizha Vesprimiensis diocesis coram dilecto filio Egidio subdiacono et capellano nostro tunc in Ungaria de mandato nostro morante super cumbustione capelle Sancti Iacobi de Heremo monasterio ipsi subiecte ac iniectione manuum violenta in monachos et conversos eiusdem necnon dampnis et iniuriis irrogatis eisdem traxissent in causam idem capellanus in eos exigente ipsorum contumacia manifesta excommunicationis sententiam promulgavit et excommunicatos denunciavit ac nunciari publice fecit eosdem Sed ipsi claves ecclesie contempnentes in eadem excommunicationis sententia iam per sex annos dampnabiliter persteterunt nichilominus se divinis temere ingerendo in animarum suarum periculum eorum preiudicium et ecclesiastice discipline contemptum Ut igitur vexatio eis forsan tribuat intellectum discretioni vestre per apostolica scripta mandamus quatinus predictam excommunicationis sententiam sicut rationabiliter est prolata facientes usque ad satisfactionem condignam auctoritate nostra sublato appellationis obstaculo inviolabiliter observari eam singulis diebus dominicis et festivis pulsatis campanis et candelis accensis sollempniter publicando si de huiusmodi manuum iniectione vobis constiterit dictos sacrilegos tamdiu appellatione remota excommunicatos publice nuntietis et faciatis ab omnibus arcius evitari donec passis iniuriam satisfecerint competenter et cum vestrarum testimonio litterarum ad sedem venerint apostolicam absolvendi invocato ad reprimendam eorum malitiam si opus fuerit auxilo brachii secularis Quod si non omnes hiis exequendis potueritis interesse duo vestrum ea nichilominus exequantur Datum Perusii X Kalendas Augusti pontificatus nostri anno nono Unde consulimus paternitatem vestram et hortamur quatenus sicut continetur in presentibus litteris faciatis inviolabiliter observari et dictos excommunicatos et villam evitetis et hec omnia ut observetis auctoritate qua fungimur precipimus alioquin contra fautores secundum quod ius dictaret procederemus