Charter Document - 04230130

Venerabili in Christo patri [Iacobo] Dei gratia Nitriensi episcopo et dilecto in Christo [Saulo] archidiacono eiusdem loci Iacobus divina miseratione Prenestiensis electus apostolice sedis legatus salutem in Domino Cum olim dilecti in Christo U[rias] abbas et conventus Sancti Martini de Sacro Monte Pannonie super ecclesia Sancti Spiritus quibusdam palatiis et aliis pertinentiis ad eandem coram diversis iudicibus a sede apostolica delegatis tandem coram nobis contra nobilem virum Fabianum militem Strigoniensis diocesis moverint questionem et idem propter eius multiplicem contumaciam ab eisdem et a nobis fuerit excommunicationis vinculo innodatus pro eo quod dicti abbas et conventus missi in possessionem iustitia exigente non poterant eam nancisci propter potentiam adversarii memorati postmodum idem Fabianus reversus ad cor volens parere mandatis ecclesie a nobis beneficium absolutionis humiliter postulavit quem nos absolvi fecimus recepto prius ab eo corporaliter iuramento quod videlicet possessionem predictarum rerum procuratoribus abbatis et conventus inferius designatis restitueret absque mora nullam violentiam de cetero vel gravamen super dictis possessionibus abbati et conventui inferendo reservata sibi proprietatis questione prout postulaverit ordo iuris Si vero mutata voluntate sepe dictos abbatem et conventum super premissis presumpseret aliquatenus molestare voluit et sponte petiit a nobis quod in ipsum ex nunc excommunicationis sententiam proferremus quam nos ferimus in presenti in quam si contrarium fecerit incidat ipso facto Unde discretioni vestre firmiter precipiendo mandamus quatinus si idem Fabianus premissa et que in suis litteris continentur quarum tenorem presentibus litteris inseri fecimus de verbo ad verbum non observaverit ut promisit auctoritate nostra sepe dictum Fabianum denuncietis excommunicationis vinculo innodatum credentes super hoc simplici verbo sine sacramento et aliis probationibus Viti et Michaelis procuratorum abbatis et conventus predictorum quos iidem abbas et conventus presente dicto Fabiano et consentiente in nostra presentia suos nuncios et procuratores ad recipiendam possessionem prefatarum rerum constituerunt et ad denunciandum vobis si illa possessio non foret restituta vel restitutam auferre idem Fabianus presumpseret vel turbare Continentia auctem litterarum eiusdem Fabiani hec est Sanctissimo in Christo patri ac domino I[acobo] Dei gratia Prenestino electo apostolice sedis legato Fabianus filius Ambrosii comitis Strigoniensis diocesis debitam reverentiam Sanctitati vestre presentium tenore innotescat quod cum auctoritate vestra essem excommunicationis vinculo innodatus pro eo quod ecclesiam Sancti Spiritus cum suis palatiis ac pertinentiis usus minus provido consilio abbati et conventui Sancti Martini ad mandatum vestrum restituere noluissemus tandem revertens ad cor cum alias de iure non possem absolutionis beneficium obtinere promisi et promitto Deo et vobis bona fide et sine fraude prestito nichilominus a me ipso corporaliter iuramento sponte et sine aliqua coactione quod usque ad tres dies predictam ecclesiam cum suis possessionibus servis et aliis pertinentiis ad eandem restituam abbati et conventui supradictis inducendo eos in veram possessionem et promitto sub debito iuramenti quod nunquam de cetero per me vel per alium dando consilium vel auxilium vel aliquo malo ingenio inpediam vel faciam inpediri quominus abbas et conventus superius nominati utantur possessione predictarum rerum pacifice et quiete Nec intrabo dictam possessionem ulterius per me vel per alium animo retinendi salva michi proprietatis in omnibus questione Et quod ad ista facienda mea intentio possit procedere sine aliqua fictione volo et peto a sanctitate vestra quod ex nunc per alios antequam ipsam proprietatem in iudicio evincam ausus fuero attemptare Et quia proprio careo sigillo presentem cartam obligationis mee duxi sigillo fratris mei Marcelli comitis muniendam Et nichilominus peto quod istam formam obligationis in formam publicam redigi faciatis auctoritatis vestre patrocinio roborantes Datum apud monasterium Sancti Martini III Kalendas Martii Quod si non omnes hiis exequendis potueritis interesse alter vestrum ea nichilominus exequantur