Charter Document - 04230095

Universis presentes litteras inspecturis Egidius domini pape subdiaconus et capellanus salutem in eo qui est vera salus Cum de speciali mandato et auctoritate sedis apostolice inter U[ros] abbatem et conventum Sancti Martini de Pannonia ex una parte et C[orardum] prepositum et capitulum Albensis ecclesie ex altera super decimis possessionum canonicorum et populorum Albensis ecclesie in comitatu Simigiensi existentium et super arbitrio super eisdem prolato ac quadam conventione super premissis facta coram nobis questio verteretur post longas et multas disceptationes ad multam instantiam et exhortationem nostram talis de consensu utriusque partis inter eos compositio intervenit quod si prepositus et capitulum Albense possent ab Andrea illustri rege Ungarie obtinere quod unum timinum salium regalium in Posonio monasterio Sancti Martini concederet annuatim ut in privilegio Albensium continetur sicut et sui antecessores lites inter ecclesias exortas talis donationis munificentia sepius sopiere abbas et conventus Sancti Martini a petitione omnium decimarum possessionum Albensis ecclesie et Sancti Nicolai et canonicorum clericorum et populorum predictarum ecclesiarum in comitatu Simigiensi usque ad hec tempora existentium perpetuo et prorsus discederent nec de cetero occasione predictarum decimarum vel arbitrii vel conventionis supradicte vel alicuius autentice scripture ad ecclesiam Albensem recursum haberent ita tamen quod predicti Albenses ponerent suis expensis dictum abbatem in possessione predictorum salium et de nonaginta marcis et de omnibus que occasione dictarum decimarum abbas vel aliquis nomine monasterii Sancti Martini aliquo tempore ab Albensibus petierant tam dictus abbas et conventus eiusdem quam predicti prepositus et capitulum mandato et arbitrio nostro et magistri Manasses archidiaconi de Sas War et canonici Strigonienses starent et omnia scripta et instrumenta ad dictas causas pertinentia in nostris manibus resignarent et si qua etiam quocumque modo retinerent vel inventa essent pro cassis et inutilibus haberentur Et tam abbas cum duobus monachis suis in anima omnium monachorum suorum quam prepositus cum duobus canonicis suis in anima omnium canonicorum Albensium promiserunt procurare et observare omnia supradicta prestito corporaliter iuramento Cum igitur Albenses privilegium ut convenerant impetrassent et per Samuelem hominem regis tunc salinarum pro dictis salibus quinquaginta marcis solutis in nostra presentia abbatem Sancti Martini in possessionem induci fecissent de voluntate utriusque partis ita statuimus et per iuramentum quod sicut predictum est prestiterunt utrique parte mandavimus observare quod abbas et conventus Sancti Martini et eorum successores non habebunt a modo recursum ad ecclesiam Albensem pro sepe dictis decimis nec ab ipsa occasione dictarum decimarum de cetero aliquid petent sed pax erit super hoc facto perpetua inter ipsos Item statuimus quod omnes possessiones Albensis ecclesie clericorum et populorum eius in comitatu Simigiensi usque ad tempora privilegii super hoc obtempti existentes et in privilegio A[ndree] illustris regis Ungarie annotate a solutione decimarum perpetuo sint immunes Si quas vero decimales de cetero Albenses vel ipsorum populi in predicto comitatu quocumque modo acquisierint monasterio Sancti Martini decimas in posterum solvant ut in predicto privilegio monasterio Sancti Martini a rege concesso plenius continetur quod in omnibus precipimus observari Item statuimus quod Albenses non impediant abbatem et conventum Sancti Martini nec faciant nec permittant pro posse suo impediri quominus monasterium Sancti Martini unum timinum salium regalium in Posonio sicut in Albensi privilegio vidimus contineri et in privilegio pro monasterio Sancti Martini a rege nuper obtento exprimitur percipiat annuatim Item statuimus quod vinum prepositi et canonicorum et communitatis Albensis ecclesie et Saneti Nicolai clericorum et populorum predictarum ecclesiarum cum sigillo canonicorum Albensium ab uno ex canonicis dato et iurato quod fraudem non faciat abbati Sancti Martini de alio vino exportando et presente homine abbatis ac similiter iurato quod malitiose non contradicat educatur Vinum vero emptitium nullus canonicorum vel populorum Albensis ecclesie educat nisi homini abbatis si presens fuerit et ire voluerit verum venditorem assignet Si vero homo abbatis absens fuerit vel presens ire noluerit assignato venditore sacerdoti loci in presentia trium de melioribus hominibus ibidem cohabitantibus emptor libere recedat Item statuimus quod si abbas et conventus Sancti Martini vel prepositus et capitulum Albense vel eorum successores contra tenorem dicti privilegii aliquid facerent in penam quingentarum marcarum inciderent et quecumque pars contrafaceret medietatem predicte pene ecclesie Romane solveret et medietatem parti arbitrium observanti et pena soluta omnia supradicta in sua remaneant firmitate Item reservavimus nobis potestatem cohercendi contumaces usque ad tempus per decretalem felicis memorie Innocentii pape tertii concessum Ad maiorem autem cautelam presentes litteras fieri fecimus sigilli nostri et sigillorum magistri Manasses archidiaconi de Sas War et canonici Strigoniensis et abbatis et conventus Sancti Martini et prepositi et capituli Albensis munimine roboratas Actum est hoc in hospitali Sancti Stephani regis in Strigonio anno incarnationis Christi millesimo ducentesimo vicesimo nono pontificatus domini Gregorii noni pape anno tertio mense Iulio die sexta indictione secunda Hii sunt rogati testes scilicet dompno Laurentio magistro hospitalis sancti regis Stephani supradicti teste Aaron custode teste Ysuntino teste Michaele teste et Iohanne sacerdotibus predicti hospitalis teste magistro Petro Ungaro et pluribus testibus Et ego Bartholomeus sancte Romane ecclesie scriniarius hoc scriptum de speciali mandato predicti magistri Egidii et utriusque partis assensu scripsi et complevi rogatus et signum feci