Charter Document - 04230034

Karissimis in Christo fratribus [] abbati et conventui Sancti Martini de Sacro Monte Pannonie Adenulfus Dei gratia Casiensis electus et universus sacri cenobii Casinensis conventus Sic Marthe ministerium exercere ut pars optima non depereat Marie regina virtutum caritas que omnibus virtutibus velud quibusdam pretiosis coloribus veterem hominem renovat omni nobilitate nobilior miro modo et disgregatos et intercapedine locorum disiunctos radiis quibusdam copulat et coniungit et homines diversi generis quasi dispersiones Israelis ad unum ineffabile unione reducit ut idem sit Deus et Pater omnium dives in omnibus qui invocant illum que licet varietate delectabili omnium electorum corda deauret et ornet in se tamen per amorem tamquam pia mater colligit universos In cuius aureis fimbriis nos qui sumus in fine seculorum una vobiscum ascripti secundum quod apostolica tradit auctoritas in ea fide que per dilectionem operatur et monastice religionis observantia qua nos eximius pater Benedictus instruxit idem cor et animum gerimus et pro vobis tamquam pro nobis Regi regum Domino supplicamus In quo non melius tante virtutis impleri constat preceptum quam ut exhibeamus proximo quod nobis secundum Deum volumus exhiberi Proinde vestram fraternitatem propensius exoramus quatenus post Martinum vestrum nostrum in vestris pectoribus habeatis Benedictum quia Benedictus noster vestro Martino detulit cum eius oratorium in nostro monasterio fabricavit Simul etiam in vestris orationibus et beneficiis spiritualibus nostri memoriam habeatis quia quantum nobis licet vos participes fecimus orationis et spiritualis benedictionis ut quibus una est in terris religionis professio eisdem sit in celestibus divine laudis iugis et miranda confessio Statuimus enim ut annis singulis in festo conversionis Sancti Pauli vestri memoriam sollempniter faciamus quam pro nobis et fratribus nostris a vobis fieri humiliter peroptamus Datum VIII Kalendas Februarii anno a Domini nativitate millesimo ducentesimo duodecimo