Charter Document - 04210375

Wier Hainrich von gotes genaden bischolf ze Gvrke tven allen den chvnt die disen brief sehent oder hoerent lesen daz wilhalm vnd perhtolt baide brveder von Strazperch vns vnbetwngenleich vnt freileich aufgegeben habent allev div reht der si iahen oder wonten ze haben von vns vnt von vnserm Goteshavse an der purch ze Lewenberch vnd an dem vrboer daz dar zu gehoert gesvecht vnd vngesvchet als ez her Hertneit von Pettowe emalen inne gehabt het vnt haben daz ze ir gesichte vnt mit ir gvetem willen demselbem herm Hertneyden gelihen vnt habent si sich verzigen fver sich vnt fvr alle ier erben desselben hovses vnt des voergenanten vrboers darvmb hat er in gegeben vierzechen March vnd hvndert March silbers gewogens als ir hantveste sagent die si im dar vber gegeben habent vnt sint des gezevge vlrich vnt Ruedolf von Scherfenberch Her Hainreich von Lindekke vnt sein svene walther Oertolf vnt wlfinch von Peylstain Moerchel von Lindekke Hainrich der Mvtel Offe von Savrawe vnser Marschalch vnd des voergenanten hern Hertneides diener Eberl wolfel von dem Holermves Fridereich der Ravmschvzzel vnt ander biderb levte vnt dar vber hab wier im gegeben disen brief zeinem vrchvnde mit vnserm hangenden jnsigel Dev lehenschaft ist geschehen vnt der brief ist gegeben datz weitenstain Nach Christes geburt Tavsent jar zwai hvndert jar vnd in dem Nevn vnt Neuntzigistem jar an sant Symons vnt sant Judas Abent