Charter Document - 04210372

Ich Vlrich von Chappelle vnd ich Otte von Zelchingen wir veriehen vnd tvn chvnt allen den die disen prief lesent oder horent lesen die nv lebent vnd hernach chvnftich sint Daz sich ver Chvnegvnt hern Hainriches havsvrowe von Cheyaewe verrichtet hat mit irn ersten chinden die sie hat gehabt bei Otakern von Lengenpach vmb alles daz Anerstorben gvt daz sie von ir mvter vern Geiseln von viehoven Anerstorben ist vnd ist daz geschehen mit irz wirtes willen Hainriches von Cheyaewe Des selben An erstorben gvtes ligent Sechzehen phvnt geltes in dem gerihte ze Lengenpach vnd Drei Mvle die geltent Drev phvnt die ligent ze viehoven vnder dem Haws vnd vier Jevch Ackers die ligent avch ze viehoven vnder dem haus vnd Ain Drittail an ainem havse daz leit ze sand Poelten in der stat vnd ist her vlriches von Viehoven gewesen irz vater Vnd ist avch die verrichtunge vnd die ebnvnge geschehen nah ir frivnde Rat Also daz man ir vnd ir wirte hern Hainriche von Cheyaewe geben schol Hvndert phvnt vnd vierzich phvnt wienner phenninge Vnd wand vrowe Chvnegvnt ir Anerstorben gvt wol geben moehte swen sie wolde davon so hat sie daz vorgenant gvt gigeben den ersten chinden die sie hat gehapt bei Otakern von Lengenpach vmb die selben phenninge die vor geschriben sint dar vmb daz sie Ane Chrieg beleiben von den Andern chinden die sie hernah gewunnen hat vnd avch noch gewinnen mach Vnd sein avch wir ich Vlrich von Chappelle vnd ich Otte von Zelchingen der vorgenanten phenninge pvrgel worden fvr die Otackers chint gegen ir mvter vern Chvnegvnde vnd ir wirte hern Hainriche von Cheyawe vnd svln in der selben phenninge geben fivnfzich phvnt ze dem naehisten vaschange vnd fivnfzich phvnt ze Ostern vnd vierzich phvnt vierzehen tage vor phingisten daz loben wir bei vnsern triwen waer aber daz daz wir in der zeit nicht enwaeren des got niht engebe so sol die vorgenante ver Chvnegvnt vnd ir wirt her Hainrich von Cheyaewe die selben wervnge haben Avf dem vorgenanten Anerstorben gvte so lange vntz daz man in die phenninge gigebe zv den tagen als vor geschriben ist vnd swaz ver Chvnegvnt des Anerstorben gvtes mer ervert daz sol sie denselben Ersten chinden geben in dem chavfe als in daz Ander gevallen ist Vnd alles daz verlehent gvt daz sie Anerstorben ist von ir mvter vern Geiseln daz sol sie avch den selben chinden geben nah hern Stephans rat von Meissaewe vnd nah meinem rat Daz dise rede fvrbaz state vnd vnzerprochen beleibe dar vber so geben wir ich Vlrich von Chappelle vnd ich Otte von Zelchingen der vorgenanten vern Chvnegvnde vnd ir wirte hern Hainriche von Cheyawe disen prief ze Ainem vrchvnde vnd ze Ainem gezivge mit unser paider Jnsigiln versigilt Vnt sint avch des gezivg her Stephan von Maissaewe her Herman von Svnnenberch her Wulfing sein prvder her Hadmar von Schowenstain Seifrid von Chranihperch Vlrich sein prvder vnd ander frume levte genvch Diser prief ist geben ze wienne an sand Nychlastage do von Christes gebvrt waren ergangen Tavsent iar zwai hvndert iar in dem Nevn vnd Nivnzigistem iare