Charter Document - 04210369

Wir pruder Friderich der apte von Raitenhaslach unt mit unser aller samnung veriehen offenwar und tun chund allen den di disen prief lesent oder horent lesen daz wir durich ehaft not vnd uon dem uwer chlaf grozzer gult da unser haus mit peuangen was hawen verchauft vnsers gotshaus aigen datz hueb in dem weilhart vnd hawen is gegewen in got unserm liebem pruder vnd pesunderm freunt herm Chunraten des Grans Richter ze vttendor vnt seiner hausfraun gedrauten unt allen seinen chinden swie di gehaissen sint mit allem dem daz zve dem aigen ze hueb gehoert versuhet vnt unuersuhet ze hostaet vnd zeueld swie iz genant ist vnt won wier daz uorgenant gutt datz hueb hawen uerchauft umbe fumf vnt zwainzich pfunt Regenspurger pfenning hawen wier den oftgenannten Hern Chunraten und sein hausfraun uron Gedrauten unt seineu chind mit der uerhegnusse unt mit dem guetem willen aller unser samnung geweltiget desselwen gutes und hawen in gesetzzet mit aller orthabung als unsers hauses vnd unsers Ordens rechd vnt beschaiden gewonhait ist daz er is ewichleichen schol hawen fur rechtes aigen an allen chrieg unt an alle ansprach von uns unt der somnung die nach uns chunftig ist mit dem selwen guet datz hueb sol er seinen frum werwen sammit anderrn seinem aigen nach allem seinem willen vnd daz der red vnd dem chauf also sei vnd daz furwas Her Chunrat der Richter zu Vtendorf daz guet datz hueb hab an rechtens aigen stat und an chrieg unt an alleu ansprach Daruwer hawen wir iem diseu hantfest gegewent uersigelt mit vnserm insigel zv einem worn vrchunt Dieseu hantfest ist gegewen ze Raitenhoslach des iars do von Christes purd woren Tausent vnt ztwaihundert iar vnt nevn vnt Neuntzig iar dezselben iares an sant Lamprechtz tag Diser sach sint gezeug Friderich uon spieglorn Ermreich unt ainweich von purchusen wernhart unt vlreich des Richters chnecht Ortel des chlosters chnecht von Raitenhoslach unt ander erwerig gezeug Der chauf und diser gewerft ist gesehen ze Purchusen in des hollers Haus