Charter Document - 04210365

Ich Johan Bvrcraf van Nvernberch vergich vnd tvn chvnt allen den di disen brief sehent oder horent lesen Daz vrowe Alhait hern wernhartes Tochter van wolfgerstorf daz lehen daz si van mir ze lehen hat gehabt vnd ir brvder Otte van wolfgerstorf daz si mir daz hat ovf gegeben vnd ovf gesant bei dem Erbern Manne hern Chvnraten van Pvechperch Daz selbe lehen han ich gelihen dvrch ir vrevnd pete willen ze rechtem Lehen irem bruder dem vorgenantem Otten van wolfgerstorf und siner Havsvrowen vrowen Gerdravten hern albrechts Stuchsen Tochter van Trautmanstorf mit sogethaner beschaidenhait jst daz di vorgenanten Ott van wolfgerstorf vnd sin Havsvrowe vrow Gerdravt erben gewinnent mit einander der lehen sol ez sin wer aber dez got nicht gebe daz si an Erben sturben so sol ez der vorgenanten vrowen alhaiden lehen sin vnd ir Erben als ez e gewesen ist vnd ir swester vrowen Margareten hern Hainrichs havsvrowen van volchenstorf vnd ir erben vnd vrowen Berchten des stalekker havsvrowe vnd ir Erben Dar vber daz ditz dinch vnd dise Sache stete vnd vnverwandelt beleibe gib ich disen brief versigelt mit meinem jnsigel Des sint Gezevge her Stephan von Meyssawe Marschalch in Osterich her vlreich van Chappelle her Chvnrat van Pvechperch her Hadmar van Svnnberch her fridrich van Stvbenberch her Hainrich van Stvbenberch her Ott van Zelking her Chraft van Svnnberch vlreich van Pergawe vlreich van havspach Gundacher van havspach Ditrich van Pilchdorf wulfinch und alber bruder van Pvechperch Ott hern wichartes svn van Imzestorf Ott van Gerlos vnd ander biderbe levt Der brief ist gegeben datz Nvernberch an sand Katherein tach Da van Christes gebvrde waren Tavsent Jar zwajhvndert Jar vnd in dem ahten vnd Nevnzigistem Jar