Charter Document - 04210362

Albertus dei gratia Romanorum Rex [] Patauiensi Episcopo desideriis tuis que semper ad nostrorum prosperitatem intenta successuum fore cognouimus gratis nouis satisfacere cupientes intimandum sinceritati tue duximus ad incrementum gaudii singularis gloriosi certaminis prelium quo rex regum respiciens humilia et alta a longe cognoscens nobis potentie sue dextra concessit de adolfo Comite de Nassav quondam Romanorum Rege in die beatorum Martirum Processi et Martiniani magnifice triumphare dum exigentibus suis excessibus grauibus et diuersis ac iustis causis per sententiam principum quorum intererat rite latam regno priuatus contra nos qui concorditer electi in Regno sibi successimus cornu contentionis erigeret et in euersionem nostri honoris per violentiam conaretur exercitu suo quem in offensam et exterminium nostrum congesserat nos inuadendo hostiliter et ad ineundum secum conflictum superbie sue nos impetu prouocando Inito autem conflictu cum ipso prouocata feruebat strenuitas et alterutrvm fremebat ur resonabat armorum concussio et hinc inde furitur et feritur acies dissipantur equorum tamquam leonum rugitus confundit auditum Nunc cesus labitur nunc lapsus celeri strepitu conculcatur Tandem ille precipuus armi ductor adolfus predictus bello collisus et victus succubuit et occubuit wlneratus non sine magna strage et captiuitate multorum nobilium partis sue illesis et saluis in persona nobis per omnia et regnaturis in eo feliciter in cuius gloriam vt iudicium et iustitiam et pacem temporibus nostris exerceamus in terris gladio temporali regnum suscepimus gubernandum Porro quia cunctis inperii fidelibus et deuotis digna pro meritis regie debetur benignitas maiestatis sic erga nos et imperium crescat tue deuotionis affectio vt in nostris conspectibus specialis merito gaudeas priuilegio gratie et fauoris Datum apud Altzayam Sabbato post festum apostolorum Petri et Pauli