Charter Document - 04210359

Ich Ortolf von Waldekk vnd Hadmar mein Brvder tvn chvnt allen den di disen brief hoerent oder lesent daz jch Ortolf von waldekk meinen tail gesaetzet han mit meins Brvder gutem willen an dem hof ze Tolheim der gelegen ist daz Wazenchirchen ze naehste an dem dorfe Hern vlrichen von Weidenholtz vmb xxxve pfvnt pfenning alter wienner vnd vmb alles daz daz er dar vef laeit ze stifte oder ze bowe daz er gesagen mag vf sein triwe mit soelhem glveb also wann jch Ortolf von Waldekk loesen well so sol ich oder mein Brveder Hadmar den selben halben hof loesen all jar an sanct Maerteins tag oder ob wir niht sein dez got niht en well so sol vnser Brveder der Meingoz von waldekk chorherr ze Pazzowe oder Her Meingoz vnser veter chorherr ze Pazzowe den vorgenanten halben hof loesen oder dar nach ob dj niht ensein vnser naehste vrevnt vnd wann wir daz verzikchen daz wir an dem vor benanten tag niht loesen oder were dann ze reht loesen sol so sol der vorbenant halber hof in dez vorgenanten hern vlrich von weidanholtz gwalt beleiben vntz hin wider vmbe vf sanct Maerteins tag vnd also offt man daz versovmt daz man an sanct Maerteins tag niht loest also offt beleibt der vorgnant halbe hof jn dez vor gnanten hern vlriches gwalt von weidenholtz vntz hin wider vmb vf sanct Maerteins tag vnd sein ovch der vor gnanten pfenning sein gwern vf dem vor benanten halbem hof gegen allen den dij jn dar vmb an sprechent dar vber so geben [wir] ze einem vrchunde disen brief mit vnser baeder jnsygel vnd mit disen zivgen dj man hie benennet Maechel von der aschahern vlriches brvder von weidenholtz Ott von Chamer chunrat von waekking heinrich der Lovtterbrvnner Diser brief ist gegeben vnd geschriwen nach Christes bvrd vber Tavsen jar vnd zwaj hvndert jar jn dem acht vnd nevnczkisten jar an sanct Aiten tag