Charter Document - 04210354

Ich Gvndacher von Storichenberch verijch an disem brief vnd tun chvnt allen den di nv sint vnd her nach chvnftich werdent daz mein vater Her Gvndacher von storichenberch durch siner sel willen vnd durch siner chinde hail vor langen zeiten het gegeben dem erbern Gotshavs daze Ebersperch pi abbt Chvnrats zeiten einen zehent ovf dem hof daze Woedling der sein lehen was von dem Gotshavs ze Pazzowe vnd het dem Gotshavs ze Ebersperch den selben zehent bestaetet mit Bisholf Rugens hant der do Bisholf ze Pazzow was als er ze recht solt Dar nach chom ez dar zv daz ich ze chrieg chom vmb den selben zehent mit dem erbern abbt Vlrichen von Ebersperch vnd do der chrieg ettlich weil het gewert do ermont mich der vorgenant abbt Vlrich seines rechtes an dem zehent mit des vorgenanten Bisholf Ruegers brieven vnd mit meines vater hantfest vnd mit anderm guten vrchvnd vnd ebent sich mit mir als verr daz ich mit guetlichem willen von dem zehent pin gestanden vnd han dem Gotshavs ze Ebersperch sein recht dar an gaentzlich vnd voelichlich erchant vnd han im den aufgegeben an der stvnt vnd bestaetet mit mines herren hant Bisholf Wernharts von Pazzow Vnd daz daz oftgenant Gotshavs ze Ebersperch fuerbaz von mir vnd von allen minen erben an chrieg vnd an mve ebichlich beleib dar vmb han ich im gegeben dis hantfest mit minem Insigel vnd mit hern Vlrichs Insigel von Chapelle der des chriges ist gewesen shidman vnd ebenaer czwishen vns peden Des sint zivg her Heinrich abbt ze Choetweig her Ott der zelkinger von Shold her Rapot von valchenberch Der Rueger von Chrems der Rapot der Richter von Chrems der Levtold von Nevnburch Friderich von Vnding Tanquart von aibling Per von Ebersperch Perhtold Meinhard vnd Pilgreim von Radendorf vnd ander piderb laevt Di sache ist geschehen Da ze Rechperch do von christes gebuert waren zergangen Tovsent iar vnd zwai hvndert iar an dem siben vnd Nevnzkistem iar in der vasten an dem sunntag nach mitter vasten