Charter Document - 04210352

Clericis laicos infestos oppido tradit antiquitas quod et presencium experimenta temporum manifeste declarant dum suis finibus non contenti nituntur in uetitum ad illicita frena relaxant nec prudentur adtendunt quam sit eis in clericos Ecclesiasticasque personas et bona interdictus potestas Ecclesiarum prelatis ecclesiis ecclesiasticis personis regularibus et secularibus inponunt grauia ipsosque taliant et eis collectas inponunt ab ipsis suorum prouentuum uel bonorum dimidiam decimam seu uicesimam uel quamuis aliam porcionem aut quotam exigunt et extorquent eosque moliuntur multifarie subiacere seruituti sueque submittere dicioni et quod dolentes referimus non nulli prelati ecclesiarum ecclesiasticeque persone trepidantes ubi trepidandum non est transitoriam querentes pacem plus timentes maiestatem temporalem offendere quam eternam talium abusibus non tam temere quam inprouide acquiescunt Sedis apostolice auctoritate non obtenta Nos igitur iniquis actibus obuiare uolentes de fratrum nostrorum consilio apostolica auctoritate statuimus quod quicunque prelati Ecclesiasticeque persone religiose uel seculares quorumcumque ordinum condicionis uel statuum Collectas uel tallias decimam uicesimam seu centesimam suorum uel ecclesiasticorum prouentuum uel bonorum laicis soluerint uel promiserint uel soluturos consenserint aut quamuis aliam quantitatem porcionem aut quotam ipsorum prouentuum uel bonorum estimacionis uel ualoris ipsorum sub adiutorii mutui subuencionis subsidii uel doni nomine seu quouis alio tytulo modo uel quesito colore absque auctoritate Sedis eiusdem nec non imperatores reges seu principes Duces comites uel Barones Potestates Capitanei officiales uel rectores quocunque nomine censeantur Ciuitatum Castrorum seu quorumcumque locorum constitutorum ubilibet et quiuis alius cuiuscumque preeminencie condicionis seu Status existat qui talia imposuerint exegerint uel receperint uel aput edes sacras deposita Ecclesiarum uel ecclesiasticarum personarum ubilibet arrestauerint uel Zaizzauerint seu occupare presumpserint uel arrestari zaizzari uel occupari mandauerint aut occupata zaizzata seu arrestata receperint necnon omnes qui scienter in predictis quomodo libet dederint auxilium consilium et fauorem publice uel occulte eo ipso excommunicacionis sentenciam incurrant Vniuersitates quoque que in hiis culpabiles fuerint Ecclesiastico supponimus interdicto prelatis et personis ecclesiasticis interdictis in uirtute obediencie et sub deposicionis pena districte mandantes ut talibus absque expressa licencia dicte sedis nullatenus aquiescant quodque pretextu alicuius oblacionis promissionis uel concessionis factarum actenus uel faciendarum in antea priusquam huiusmodi constitucio prohibicio seu preceptum ad noticiam ipsorum peruenerit nichil soluant nec supradicti seculares quomodo libet recipiant et si soluerint uel predicta receperint in excommunicacionis sentenciam incidant ipso facto a supradictis autem excommunicacionem et interdicti sentenciis preterquam in mortis articulo nullus absolui ualeat absque sedis apostolice auctoritate et licencia speciali cum nostre intencionis existat tam horrendum secularium potestatiuum abusum nullatenus sub dissimulatione transire non obstantibus quibuscumque priuilegiis sub quibuscumque tenoribus formis seu modis uerborum concepcione concessis Imperatoribus regibus et aliis supradictis que contra premissa in nullo uolumus alicui uel aliquibus suffragari Datum aput sanctum petrum vi k marcii pontificatus nostri anno ij