Charter Document - 04210349

Nos Heinricus dei gratia ecclesie Ratisponensis Episcopus Et Albertus Comes de Hals tenore confitemur presentium quod cum inter Reverendum patrem dominum Wernhardum venerabilem Patauiensem Episcopum ex parte vna Et nobiles viros Perngerum wernhardum Heinricum Comites de Levnberch ex altera super Castro et turri in Morspach et attinenciis eorundem contentionis questio verteretur Partes premisse in nos tanquam in arbitros arbitratores et amicabiles compositores de bona voluntate equaliter consenserunt promittentes firmiter bona fide vice sacramenti pro rato tenere et inuiolabiliter obseruare quicquid in premissa causa inter eos per nos arbitrari contingeret et decerni Nos itaque acceptata arbitrandi seu componendi potestate gratanter inspectiis hinc inde cause meritis prout tanti negocii grauitas requirebat Consideratis quoque dampnis offensis et iniuriis Patauiensi Ecclesie atrociter irrogatis et futuris periculis precauere volentes arbitrando pronunciauimus in hunc modum videlicet quod predicti Wernhardus Perngerus Heinricus Comites omni iuri liti et accioni que eis competebant vel conpetere poterant quomodo libet in Castro et Turri in Morspach et attinenciis eorumdem in Manibus Reuerendi Patris domini Patauiensis predicti a quo eadem se asserebant in fevdum optinere cedere renunciare deberent voluntarie simpliciter et precise saluo jure quod eisdem Comitibus in locis que dicuntur Chatzperch et Nider Morspach conpetit vel conpetere potest ad que presens arbitrium non extendimus sed ea de certa sciencia excludimus ab eodem Non intendentes derogare per hec ordinationi que de eisdem locis inter felicis Recordationis dominum Petrum quondam Patauiensem Episcopum et bone memorie dominum Wernhardum seniorem Comitem de Levnberch intercessit Item predicti Comites omnes literas et instrumenta data per Patauienses Pontifices quibus possit presenti arbitrio derogari resignabunt domino Episcopo antedicto quas quidem literas tam in iudicio quam extra exnunc in antea decernimus nullum optinere vigorem Preterea sepedictus dominus Episcopus Patauiensis relaxare et ignoscere debebit omnes iniurias dampna et offensas sibi et Patauiensi Ecclesie irrogatas per memoratos Perngerum wernhardum Heinricum et seruitores eorundem cuiuscunque conditionis existant eosdemque comites ad gratiam recipere specialem Hoc saluo quod iniurias et dampna Ciuibus Patauiensibus irrogata per Comites memoratos in se predictus Patauiensis Episcopus non recipiet nec satisfaciet pro eisdem sed trivgas usque ad natiuitatem domini venturam proxime firmabit inter illos quibus durantihus lesos Ciues mitigabit ad remittendum suas iniurias quantum poterit inclinando Et si Episcopus apud predictos cives non profecerit ipsos ad concordiam cum dictis Comitibus reducendo ex tunc predicti Comites se defendendo vel Ciues Patauienses offendendo tanquam priuatos hostes suos integritatem amiciciarum non corrumpent et indignationem domini Episcopi non incurrent Quod quidem arbitrium partes videlicet Episcopi et Comitum predictorum cum gratitudine et cordis gaudio concorditer approbarunt Episcopo suis injuriis renunciante et Comitibus suis juribus cedentibus secundum formam arbitrii prelibati In cuius rei perpetuam memoriam presentes dedimus literas nostrorum necnon Reuerendi patris domini Wernhardi Patauensis Episcopi et Illustris domini Stephani ducis Bawarie et predictorum Perngeri Wernhardi Heinrici Comitum de Levnberch sigillorum munimine roboratas Huius rei testes sunt dominus Wolfkerus decanus Patauiensis Magister Engelscalcus Canonicus Patauiensis Magister Eberhardus Canonicus Ratisponensis Magister Gregorius et Heinricus notarii Dominus Heinricus senior de Schovnberch dominus Rapoto Comes de Ortenberch Heinricus de Radekk Pero Pincerna de Anzenchirichen Heinricus de Sigenheim Ludwicus Granso Otto notarius Curie Pataviensis Datum et Actum Vilshouen anno domini MCC Nonagesimo quinto Sabbato quatuor temporum ante festum beati Michahelis Nos itaque Perngerus Wernhardus Heinricus fratres Comites de Levberch presentibus confitemur suprascriptum arbitrium de nostra voluntate processisse nosque ipsum in omni sui parte gratis animis approbasse In cuius rei testimonium presentibus nostra sigilla duximus appendenda Datum vt supra