Charter Document - 04210347

Ich dimuet Levtoldes hovsfrowe von stadekke tvn chvnt alle den di nu sint vnd her chvmftich werdent daz ich geben han ledichleich vnd stehtichleich an allez furzog hern vlrich von chappelle hern pilgreims svn vnd sinen erben daz dorf halbez ze steteldorf vnd zway lehen daz min mueter vre dimut vnd ich gehabte haben ze rehtem lehen von vnserm herren dem purkgraven von Nurnberch mit alle diev vnd da zue gehoeret zeholtze vnd ze velde an aekern an zehenten perchreht oder purchreht verlehent guet oder vnuerlehent oder swi iz genant ist versuecht vnd vnversuechte wer aber daz der vor genant vnser herre der purkraf von Nurnberch hern vlrich von chappelle vnd sinen erben niht leichen wolt von swelicher shlachte chrieg oder irresal daz geschaech so offen ich dimuet di vor genant daz ich mein taeil an dem dorfe ze steteldorf mit alle div vnd da zue gehoeret als vor geschriben ist gesatzet han hern vlrich von chappelle vnd sinen erben vur zway tavsent march lotiges silbers dar vber han ich im den selben halben taeil des dorfes ze steteldorf daz mich an gehoert [an] ein gerichte vnd zehent vnd perchreht daz ich von minem herren dem herzogen von Osterrich gehabte han daz han ich auf geben vor dem herzogen von Osterrich vnd hat er daz gelihen dem genanten hern vlrich von chappelle vnd sinen erben Daz dise red stet beleibe vnd vnuercheret gib ich dimuet disen brief hern vlreich von chappelle vnd sinen erben ze einem vrchvnde versigelt mit meinem jnsigel vnd mit den zivegen di hie geschriben sint Daz ist her heinrich von stvmberch der stuchse von Trautmanstorf heinrich von liehtenstein Otte von Celking Haug von Reichenstain Alolt von Hawnvelde Stephan sin bruder vnd ander biderber livte genuch Der brief ist geben do von Christ geburde waren Tavsent zway hvndert iar nah nevnczich iaren in dein fvmften iar an dem antlaz tag