Charter Document - 04210344

Wyr Eberhart vnd Hainrich prueder von walsse veriehn vnd tun ze wizzen allen den di disen brief an sehnt oder heornt lesen daz wier mit verdahtem muet alle vnser gult di wier ze gehugnusse pringen mohten getailt haben in zway tail an dise gult alain di hie hernach beschaidenleich geschriben stet di haben wir pei ein ander vngetailt lazzen vnd doch mit solicher beschaidenhait daz wier gelobt haben gegn ein ander swelicher vnder vns paiden an islicher gult seinen tail vergiltet der sol von der gult furbaz ledich sein vnd swaz schaden auf den andern halben tail darnach get den schaden sol der ain haben der des selben guetes gelter ist an daz der ander der seinen tail vergolten hat mitsampt disem prueder purgel sol sein vnd sol ouch im der Gelter davon an schaden helfen Daz ist nv di gult di wier vngetailt gelten suln Des ersten der glausingerinne drevzehn phunt an sehtzich pfenning Hern Hainreich vnd hern Prehtleyn vnder den Louben drey vnd zwaintzich March silbers vnd vierzehn pfunt pfenning den zwain pruedern Goltsmiden fumf Schillingen vnserm Schuester ze wyenne Nivnthalben schillinch Otten vnder den Louben fumf pfunt Maister Perhtolden driv vnd Nivntzich pfvnt hern Chunrat sunen von Eslarn dritthalb pfunt dem fueterer an dem graben Nivn Schillinge an vier pfenning Otten vnserm vertigen wiert in dem hous zwelif schilling Otten vnserm hivrigen wiert vier pfunt an sibenzehn pfenning Purgeyn zwelif schilling Agnesen in dem hous driv pfunt vnd zehn pfenning Chunrat dem Vetzinger drei March silbers hern Hiltprant von Scheonnawe zway pfunt wernhern dem Beheym fumfthalb pfunt Eysach dem Juden ze wienne vmb pellitz ahtedhalb pfunt Pentzen von Stayna driv vnd sehtzich pfunt Chunraden von Alydorf driv pfunt vmb hern Staynmars pfertt driv pfunt Hermanne in dem Tuern fumf vnd zwaintzich pfunt friderich Muerrleyn dreizzich pfunt hern walthern von Tanne fumftzich pfunt hern Chalhoch von pernowe ainsunnzwaintzich pfunt dem Tungozzinger zwaintzich pfunt vnd viertzich pfenning dem Munizmaister ze Ense Sehs pfunt an dreizzich pfenning dem Schueler ze Stayn Ainsuntzwaintzich schilling Den Greynern ahtzehn schilling HainRich ab der wyse vier pfunt an dreizzich pfenning dem Greymstainer sehs pfunt vnd sehtzich pfenning Hyerzen dem vischer zwelif schilling Daz dise red vnd daz gelubd von vns stet beleib daruber haben wir disen brief schreiben haizzen ze vrchunde vnd bestetigt mit vnsern Insigeln Diser brief ist geschriben nach Christes geburt Tousent iar zway hundert Jar in dem vier vnd Neuntzkisten an vnser vrowen tach ze der Liehtmezze